香港BB唔洗瞓咁多？

原本諗住繼續講connection before correction，但係今日同一位媽咪傾電話，聽完佢嘅經歷之後，屈住道氣不吐不快

香港家庭一般面對2個特別嘅問題 -- 雙職父母（所以難畀BB早瞓），同埋下午班（撞咗午睡時間）

當然，喺編排時間表時，我哋必須要考慮到呢啲情況，建議返一個實際上能夠執行到嘅時間表。

但係，咁並唔代表，BB/小朋友嘅睡眠需要會同外國唔同！唔代表香港嘅BB就可以瞓少啲囉！（完全唔明個logic喺邊 ）

外國顧問好多都會建議夜間睡眠預12小時。

的確，實際上唔係咁多BB可以瞓到咁耐，但亦唔代表因為咁而只預9-10個鐘

係完全唔足夠呀，並非健康睡眠嘅做法囉...

除咗太夜瞓會影響睡眠質素外，亦會影響大腦分泌生長激素，對BB發育可能有負面影響㗎！

媽咪爹哋想BB瞓得好，亦會想佢哋瞓得健康，但結果畀錢後反而得到一個唔健康嘅時間表，點解會咁？

其實呢個情況已經遇過好多次，但只係見到越嚟越極端...

*除非係歲幾2歲，午睡瞓到2.5小時以上，咁10個鐘都或者ok，但6個月以上嘅BB，一般都預最少11小時

夜間睡眠時數不足都算嘞，最大問題係unrealistic嘅清醒時間！

清醒時間係指由BB瞓醒開眼，到佢合埋眼瞓返之間嘅時間。初生BB只有45-60分鐘，隨住BB越嚟越大個，清醒時間會越嚟越長。

除咗月齡之外，上一覺嘅長度及質素、清醒時嘅活動、環境刺激等，都會對清醒時間有直接影響。

一般嚟講，清醒時間係有個range嘅，希望BB能夠順利入睡，同埋唔會頻密夜醒，就必須要睇住就寢前嘅清醒時間。

絕對唔係拖長啲個清醒時間，令BB攰啲，就會可以瞓得好，唔會夜醒大喊。

相反，當BB攰得滯，至會半夜勁醒，就算做睡眠訓練令BB能夠自行入睡，都一樣唔會可以「一覺瞓天光」

10個睡眠顧問，9個半都會同你講以上嘅理論，因為呢個係科學。

嬰幼兒睡眠係科學嚟。

留言我寫咗各月齡嘅建議最長清醒時間，請注意係最長，日頭一般會短30-60分鐘不等。

當然，有啲BB可能會可以長少少都唔定，但如果長多過1鐘，咁就應該係有啲問題，特別係有夜醒早醒情況的話（就算能順利入睡已經冇乜點喊）。

仲有一點想講嘅就係，唔係BB好快瞓得著就係好。

一般嚟講，成個入睡過程，會係15分鐘左右（10-20分鐘不等）。

如果BB秒睡（一般指5分鐘內）嘅話，其實即係佢已經好攰，呢個亦非健康嘅睡眠習慣。

所以，唔係拖到就寢時間有咁夜得咁夜，令BB攰到斷電，就話BB識得自行入睡。

*唯一例外係一個提早小朋友就寢時間嘅方法，就會係咁做，但之後都會慢慢提早返瞓，得幾個月嘅BB唔會需要呢個做法

我明白好多雙職家庭，喺安排BB作息時間上係有多好多掣肘同顧慮，亦好希望同BB有時間相處，培養親子關係。

我其實有計劃整一份專為雙職家庭而設嘅指引，講解點樣去制定一個作息時間表，能滿足到BB嘅睡眠需要，同時又可以配合到大人嘅活動時間。

到時應該會以bonus形式，放埋喺睡眠調整全面睇課程入面

不過我需要多啲motivation去開工，唔該大家畀啲壓力我啦

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

安全睡眠ABC