囝囝成日喺床郁嚟郁去
「BB瞓覺成日會郁，係咁腳撐撐，碌嚟碌去，係咪唔舒服？」
「BB而家同我瞓，但半夜成日瞓到打橫咁，又會成日踢到我，佢瞓嘅空間比喺嬰兒床細好多...」
你知唔知點解會有人發明嬰兒床，點解四邊要圍住？
咪就係因為BB瞓覺時會打風咁郁嚟郁去囉！
我記得我自己兩個仔，應該去到差唔多3歲，至會好似大人咁樣攤直瞓，個頭一直都係向住同一邊。
之前佢哋好興趴喺度捲埋，個頭頂住床角嚟瞓，而且每次睇cam個頭都可能係轉咗向住另一邊
早幾日都有提過，冇人會成晚瞓著咗郁都唔郁嘅，我哋總係會不自覺去郁，搵個舒服嘅姿勢去瞓返。
所以，BB嘅睡眠範圍必須要清空，避免佢會被軟身物品阻礙呼吸，甚至纏住身體部位，就係咁解。
伸延閱讀：
《1歲前都唔可以趴睡？》https://bit.ly/3bt8OYW
《美國兒科醫學會的安全睡眠指引》
另外亦提一提，好多媽咪爹地諗住擺喺枕頭同被喺床邊，防止BB跌落床，其實會製造咗一個假象。BB郁起上嚟，絕對可以一腳踢走個枕頭，甚至照碌過去㗎
分隔床 / 床中床等產品，亦唔能夠保證BB嘅安全。所有會限制BB活動能力嘅枕頭或者睡眠輔助器（例如babymoov），無論講到幾安全幾天花龍鳳都好，其實冇一件產品得到任何認證，因為根本就冇呢方面嘅標準及監管。外國曾經有好多BB出咗事，父母恨錯難返
加床欄，亦唔能夠保證安全，尤其是如果欄同床之間有少少空隙，BB都有可能會碌埋去夾住咗透唔到氣（亦係唔建議用床圍啲其中一個原因）。
1歲以下嘅BB，最安全一定係自己瞓BB床（必須遵守 #安全睡眠ABC*）。但如果因為空間所限，或因為家長嘅育兒觀而決定同床而睡，咁就必須要做好以下幾點，並且明白就算做到足，都仍然存在一定風險。
《與嬰兒同床而睡》
《與嬰兒同床而睡的實際安排》http://bit.ly/2Zcj5FX
*安全睡眠ABC = Alone, on their Back, in a Crib
