帶BB去旅行 睡眠及時差問題

琴日分享咗有關帶BB搭飛機嘅經驗，今日講講好多媽咪爹哋都關心嘅 瞓覺及時差問題

如果只係搭短途機，預咗BB唔會肯瞓覺。所以最好揀日頭機，冇瞓小睡嘅可以提早下一覺30-60分鐘去補返。

夜機的話，BB一定要瞓，所以好建議營造一個舒適嘅環境畀BB（要有心理準備多數唔會瞓到咁多個鐘，但亦無謂太擔心啦！）

坊間有啲產品係專為帶BB／小朋友搭飛機而設，個原理都係將座位延長，令BB可以打平瞓低，或令小朋友對腳可以有嘢墊住，瞓得舒服啲。

例如可以同時作為行李箱用嘅JetKids Bedbox，仲可以畀小朋友騎喺上面，一物三用。Flyaway Kids Bed就係一個T型嘅充氣床墊，直接放喺座位上面唔怕移位，而且亦乾淨舒服啲。

BB產品一定唔平，以上兩件產品都要千幾蚊，覺得貴嘅話，百零蚊買個充氣腳枕其實已經得，上面鋪張被就攪掂

提提你，為咗確保通道暢通，以上產品只能夠喺窗口位，或者中間嗰排最入面嗰2個位至用得。

另外，亦唔係所有航空公司都會接受以上產品，諗住買JetKids 或Flyaway嘅話，記得要check你會搭嗰間航空公司係咪喺個Airline list上面（產品網站可以搵到），最好用手機screenshot埋添！

但飛機上面一定有燈，點樣營造黑暗環境呢？

你可以自製帳篷，遮擋燈光及外間事物

製作帳篷嘅方法好簡單，只需一張深色毛氈（我用飛機嗰張，反正唔會掂到BB），以及兩個大夾（夾沙灘椅嗰啲）。將毛氈嘅一邊用夾固定喺小朋友座位嘅頭墊上，然後打開餐枱，將另一邊夾住，就攪掂嘞！

只不過，呢個做法未必個個機組人員都接受。我試過得到空姐嘅稱讚，亦試過被要求拆咗佢（不過都只係試過一次），要睇彩數…

用開白嘈音的話， 飛機飛行時其實已經有聲，所以未必需要，想用嘅就要留意聲量唔好嘈到其他人（但部機又唔可以太近BB…）。

所以通常我唔建議用安眠曲，除咗可能會對大腦造成刺激外，搭飛機播歌，對其他乘客嘅騷擾亦更大

至於入睡方式，習慣抱睡嘅當然都係抱睡後放低。如果係床上入睡的話，盡量做返睡前儀式畀 BB喺自己喺座位瞓。有用開安撫公仔或其他安撫物品，記得帶埋上機。

萬一BB大喊，為免騷擾其他人，我會抱BB去飛機中間或機尾較空曠嘅位置（即係餐點準備位旁邊同廁所）。

非常唔建議抱住BB喺走廊上上落落，阻住其他人行之外，BB喊聲忽遠忽近其實比一直聽住BB喺身邊喊更難受，亦影響到更多人… （呢個係運用冥想式哄睡法嘅時候，唔知咩嚟？快啲睇返2022年嘅免費工作坊啦！）

喺機上面，我會盡量畀BB瞓就得瞓，唔會理時間表，反正有時差問題都係要再調整過。

講到時差問題，如果只係差1-2小時的話，可以預早1-2個星期開始調整，只要每1-2日提早叫醒BB同將成個時間表提早（目的地快1-2小時），或者延後nap 1同其他覺 15分鐘就得（目的地慢1-2小時）。

又或者，如果BB習慣早起，而目的地時間快1個鐘的話，咁你唔需要做任何調整，去到將個鐘較快就得，等如BB遲咗一個鐘起身！

不過如果目的地係慢一個鐘的話，就最好預早啲去做調整嘞。你唔想去旅行玩但朝朝5點醒啩…（如果你BB平時已經係5點醒，咁就有早醒問題，需要搵方法解決，歡迎搵我傾傾 ）

而如果目的地同屋企相差好多個鐘的話，咁我就唔會預早調整，但建議盡量唔好帶BB出夜街，等佢可以瞓得足啲，去到目的地即刻跟返當地時間就得。

如果BB一向好早醒，時差其實可以幫到你restart BB嘅作息時間，你可以完全唔理之前幾點起身，直接定一個你覺得最理想嘅起身時間畀BB就得（但建議都係7-8點之間，唔好太遲…）

BB一向有穩定嘅作息時間，調整時會比較順利。但如果你BB一向起身同瞓覺時間都好飄忽，兼且欠落睡眠債，加上一定要抱睡，咁就會比較難處理。而且出現時差問題時，亦會需要更長時間去適應。

你對於帶BB搭飛機或睡眠處理上仲有冇乜嘢問題呢？歡迎留言發問