想有me time，但囝囝痴實唔放人…
琴晚，揼低老公同孖仔，自己去市中心聽音樂會
孖仔雖然平時習慣自己玩，但其實勁痴我，乜都要我幫佢哋做，唔畀孖仔爸爸幫...
夜晚做睡前儀式，孖仔A好間唔時會肯畀爸爸同佢刷牙，但孖仔F係點都指明要我做。
唯一例外，就係我要出夜街嘅日子（冇得揀嘛 ）。
其實自從covid，已經好耐冇自己出街
琴日朝早食完早餐，我就同孖仔講，今晚我要出街，所以爸爸幫佢哋刷牙洗面換衫瞓覺
佢哋即時當然唔制，話會掛住我，又話要同我一齊去。
只不過，最後佢哋聽到我話第二朝就會再見到我，就安心話ok嘞
我知道好多媽咪都面對同樣嘅情況，小朋友一定要媽咪陪佢，媽咪唔喺度就唔肯瞓覺。
當然，每個小朋友性格唔同，每個家庭嘅情況亦有分別...
只不過，如果你未試過，又或者試過但唔work，我會建議先諗吓，會唔會喺處理方式上可以改變一下
好多時，為免提早出現掙扎及反抗或爆喊等情況，我哋都會選擇唔同小朋友講即將會發生嘅事，或者瞞住佢偷走
但其實，咁樣做，反而會令小朋友失去安全感，對你失去信任
因為，佢唔知道幾時會突然唔見咗你，所以會好擔心，不斷捉住你唔放。
解決分離焦慮嘅方法，#唔係全日24小時陪住囝囝囡囡，而係令佢明白，你走開咗之後會再返嚟。
除此之外，預先同小朋友講定會發生乜嘢事，畀佢做好心理準備，亦係 #RIE育兒法 嘅重點之一。
搵返舊文，2年前我都寫過一篇文《孩子是懂事的》*，嗰晚我又係要出街，同孖仔預先講好，之後佢哋出奇地合作，畀我準時出到門口（平時要佢哋刷牙會當我透明或速逃 ）。
如果你希望第日囝囝囡囡去街會同你講，由今日開始你都同預先佢講定啦！
*文章連結見留言
P.S. 琴晚其實超級好彩，泊車冇散銀有陌生人幫我畀，睇音樂會因為太遲至到冇晒飛，但有人留咗張免費飛喺counter，所以冷手執個熱煎推
