俾BB自由活動，唔代表放電㗎 !
好多人都會認為，想BB瞓得好啲，要俾佢哋放電。
意思係，只要令佢哋活動多啲攰啲，「自然」 會瞓得好啲...
睇開Dolce Sleepers嘅媽咪爹哋應該都知道，我唔係放電派。
從健康睡眠嘅角度，亦唔會建議特登整到BB攰過龍，去解決入睡困難或夜醒早醒等問題（咁簡單嘅話，就唔會咁多家庭長期睡眠不足啦 ）
但同時，我亦都成日話，RIE育兒法好鼓勵多啲畀BB自由活動...
可能你會問... 咁即係點呀？
畀佢自由活動但又唔係放電，即係乜嘢意思？
其實，BB知道自己攰定唔攰㗎！
只要係有真正嘅自由活動時間，佢會自然調整活動量。
當佢覺得精力充沛，就會走嚟走去；當佢覺得攰，自然會做靜態啲嘅活動。
所以，畀BB自由活動，唔代表放電㗎！
重點係唔好成日將BB放喺會限制住佢活動能力嘅地方（例如餐椅或學坐椅），或者太狹小嘅空間，令佢想爬都冇位去爬。
因為，未有足夠嘅活動時間及空間，會影響到BB嘅身體發展（例如skip咗爬行階段，或過早識企... 想知點解嘅留言話我知，多人有興趣就另外寫篇文講講Pikler Approach）
而且，當長期被限制住活動能力，對BB嘅情緒、性格、好奇心、意志力等都會有負面影響。
例如你會見到有啲BB可以坐得好穩，但啲玩具太遠佢會唔敢伸長隻手去拎，因為怕跌親，久而久之可能就會失去勇於探索及嘗試嘅心，容易放棄
講返去睡眠，希望BB瞓得好，你要做嘅係幫佢穩定作息時間，令佢每日到時到候就自然覺得想瞓覺。
千祈唔好見BB瞓得唔好，就特登畀佢日頭瞓少啲，或者帶佢做好多活動整到佢好攰，諗住可以瞓得好啲呀！
BB嘅適應能力好高，日頭真係嚴重唔夠瞓，夜晚攰到一個點，真係會怒瞓唔醒...
但呢個絕對唔係健康嘅做法
你囝囝囡囡夜晚要瞓覺嘅時候，總係好興奮，大叫大笑，彈嚟彈去完唔攰咁嘅樣？
佢可能並非唔夠攰，而係攰得滯，於是進入精神亢嘅狀態，想瞓都瞓唔著啦...
伸延閱讀：
《睡眠誤解系列 - 放完電就瞓得好？》https://blog.dolcesleepers.com/blog/release-energy
