遲瞓遲醒, 早睡早醒? 媽咪分享

好多時候，當BB成日天未光就醒咗，就會有人建議：「遲啲至瞓，咁就自然會遲啲醒啦！」

如果真係咁簡單的話，就好嘞！

但係，真實嘅情況通常都係：

太遲至瞓，BB已經攰過頭，瞓得唔好，結果反而會更早醒囉...

相反嚟講，畀BB早啲瞓，只要配合適當嘅清醒時間，BB至瞓得好，朝早亦唔會咁早醒。

下面貼一位媽咪嘅親身分享：

「唔知點解prioritise bb睡眠好似唔啱咁，講到我成日唔帶佢出街，又話唔一定要午睡，攰就會瞓，夜晚好精神呀仲跑來跑去……

我大仔早幾日病左，我送左去奶奶度隔離，工人講返我知囝囝10pm瞓，6點就醒

奶奶仲話9點半入房裝吓佢，佢仲彈起身叫嫲嫲，話咩而家瞓覺仲要氹咁耐… 我心諗佢已經亢奮咗，要用差不多1小時去平伏好正常呀… 你仲去騷擾人打斷人wind down...

之後我下令晚上8點半要刷牙入房，結果琴晚9點已瞓咗，瞓到朝早7點幾。放心晒...」

♡♡♡

要打破一般人嘅睇法，反其道而行唔係一件容易嘅事...

但只要你知道咁樣做對囝囝囡囡係最好嘅就得，其他人講乜嘢微笑點頭就算啦！呢位媽咪你要繼續堅持住呀！