點令小朋友願意合作刷牙?

你囝囝囡囡鍾意刷牙嗎?

定係每次都有一番掙扎?

成日都見到有媽咪問，點樣可以令小朋友願意合作刷牙，擘大口唔會郁嚟郁去...

常見嘅方法有畀幾隻牙刷and/or牙膏佢揀，同小朋友一齊刷、畀佢自己刷咗先，甚至畀佢同你刷然後掉轉...

又或者，同佢睇書，或嘗試同佢講道理 -- 唔刷牙會蛀牙、會好痛、會食唔到嘢，甚至要剝晒啲牙...

我明，以上所講嘅方法，我都做過晒

我仲試過同孖仔扮太空人刷牙，扮電動牙刷...

信我，諗得出嘅我都做過晒…

通常會work幾日，但好快就唔再肯合作...

點解呢？

點解成日都要鬥智鬥力咁樣呢...

尤其是，睇住個鐘，就嚟夠鐘瞓覺，個心就越嚟越急，最後要出動雙手雙腳夾住至刷完

小朋友都唔想特登攪對抗㗎

一般嚟講，當小朋友唔肯合作或聽從指示，其實唔係佢哋唔想，或要特登攪事...

佢哋只不過係受當時情緒所控制，於是一時衝動所致。

所以，就算你同佢講道理，都唔會有用...

咁可以點做呢？

首先，一定要搵出係乜嘢trigger到佢。

要成功搵出原因，我哋必須要由小朋友嘅角度去睇件事。

諗吓我哋去睇牙醫時，當牙醫喺用工具喺我哋個口入面撩嚟撩去，你會enjoy嗎？定好想佢快啲攪掂呢？

同樣地，當我哋拎住隻牙刷，喺小朋友係口入面郁嚟郁去，其實小朋友覺得唔舒服，唔鍾意要抗拒係好正常嘅事呀！

於是我同孖仔講：

「我知道，我用隻牙刷喺你口入面撩嚟撩去，你覺得唔舒服。我將會話定畀你聽，會刷邊度，而且我會細細力慢慢刷，希望令你覺得舒服啲 」

當我將牙刷放入佢個口前，亦會講定：

「而家我會刷你左邊、上面嘅牙... 我要將隻牙刷放喺你啲牙，同埋面之間嘅位置，可能會有啲唔舒服，我會慢慢刷，請你放鬆。」

令小朋友合作嘅重點

預告，預告，再預告。

同埋要慢--慢--慢。

仲有，每次刷牙嘅次序都保持一樣。

加多一點，就係我哋自己要保持輕鬆冷靜。

刷牙係一種需要小朋友合作，至能夠做到嘅活動。

我哋唔可能強迫小朋友同我哋合作，必須要佢哋願意去做至得。

所以，我哋必須要以尊重小朋友嘅心態，去尋求小朋友嘅合作，並且將自己嘅期望降低一啲，進行活動時亦要細柔啲輕手啲。

預先講定，加上每次一樣嘅次序，令小朋友能預知到即將發生嘅事，自然更願意合作。

歡迎小朋友參與活動

話明係合作，必須要畀小朋友參與至得，畀兩個選擇佢揀，令佢覺得自己可以有say。

亦可以畀佢嘗試自己做，令佢能夠得到成功感，從而建立自信，自然就唔會咁抗拒啦！

同一套方法，其實喺好多其他活動上，例如沖涼洗頭、食嘢、執玩具，仲有準備瞓覺等等，都好有效㗎！

伸延閱讀：《瞓覺嘞，好唔好?》