小朋友越大越夜瞓，係咪時候停止午睡？

Florence媽媽問：

「Hihi Catherine, 我有一樣嘢想問… 我小朋友依家兩歲半左右，盡量保持返nap time，大約一點瞓，瞓到2-2.5hours. 我哋臨瞓之前會一齊玩，然後先瞓。但係近呢個月，越嚟越遲瞓，又本來9:30瞓着，依家搞到10:30…..其實係咪已經唔再需要nap time? 但係佢差不多一點，又真係會有眼瞓時間….心裏好矛盾，我好唔想佢瞓唔到」

我答：

「有得玩唔願瞓正常，唔代表要停止午睡㗎！

可以試縮短午睡，但重點我覺得係睡前活動，玩到太興奮，自然更難靜落嚟瞓覺呀！」

過咗2日，收到Florence媽媽嘅update...

「我好想分享…..

平日我哋兩個因為要返工返嚟基本上都係陪佢，但係佢就會越搞越夜。

琴日第一日試吓唔俾爸爸入嚟房，淨係得我同BB玩一陣靜態活動然後瞓覺，雖然佢好想玩返平日嘅Routine，但我將所有嘢加快縮短時間，雖然都係要我陪佢瞓，但係就快好多瞓得着。

等我哋今晚再試吓

在一次多謝你」

原本諗住件事過一段落，點知過幾日又收到Florence媽媽嘅message...

雖然第一晚冇爸爸陪玩，成功好順利就瞓到。

但第二晚第三晚都係咁，小朋友發現唔對路，於是喊住搵爸爸。

於是，爸爸再次留返喺房，但就只做靜態活動，唔再玩到好癲。

小朋友其實有啲扭計，不過入睡情況總算叫做正常返，冇再好似之前咁攪到咁夜嘞！

絕對明白，媽咪爹哋好珍惜同BB／小朋友相處嘅親子時間，尤其是雙職父母。

但營造睡前氣氛，係非常重要，卻經常被誤解嘅一點。

好多媽咪爹哋都知道要同囝囝囡囡做睡前儀式，於是同佢一齊做好多親子活動或遊戲，希望小朋友能夠愉快入睡。

問題係，當玩到好開心嘅時候，小朋友唔願停好正常。

而為咗唔會令小朋友唔開心，睡前儀式往往越做越長，我聽過最誇張係做2-3個鐘！

咁樣其實已經失去咗睡前儀式嘅意義㗎嘞。

而且，玩到好興奮嘅時候，突然話要熄燈瞓覺，小朋友無論生理同心理上都未準備好，自然會好抗拒。

所以，必須要預返一段時間，畀小朋友做transition至得。

你可以預早啲開始，畀小朋友喺房外照同爸爸玩，只要預返時間入房慢慢wind down就得。

記得要預返個心連心嘅活動喺房做，咁至能夠令小朋友有多啲意欲入房（幼兒睡眠問題雞精班有更多建議！）

之不過，如果你BB未滿2歲的話，夜晚瞓覺前兩個鐘最好都係平靜一啲，唔好玩到太興奮；亦唔好畀BB睇電視或手機等電子螢幕，避免令BB大腦受刺激過度，導致之後好難靜落嚟瞓覺，亦會直接導致夜醒。

幫BB準備瞓覺嘅活動，例如餵奶／換片／換睡衣等，其實亦都係親子時間。

慢慢去做，同BB建立簡單嘅雙向溝通，邀請佢嘅合作，更能增加你同BB嘅親密度。

#睡前儀式唔一定要睇書講故事

#越細個越簡單就好

#慢慢長大至加入新活動就得

P.S. 早咗熄燈但小朋友都係瞓唔著？可能係生理時鐘影響！解決方法係呢度！

唔想錯過正向睡眠及教養文章分享，立即加入whatsapp群組啦！