在職媽咪分享

在職媽咪分享

原本一晚醒10次

短短五日夜晚瞓覺情況就有顯著改善

網上課程冇做諮詢咁大壓力

睇片睇到欲罷不能

「 兩星期時間過得好快，第一星期因為屋企有啲事比較忙，未能夠睇片，到星期日半夜me time時追返啲片，竟然有種欲罷不能嘅感覺 後來跟住嘅每日都有啲期待咁返工放工之後睇Catherine嘅片同做功課」

好慶幸自己當初有報讀呢個課程，Catherine喺介紹呢個課程時所講嘅，其實真係好中我嘅心聲

bb女喺4個月開始瞓得差，抱抱抱抱，抱成半個鐘到9點入睡，但好多時半個鐘後就大喊醒，氹返後1個鐘又醒，一晚可以醒10次有多，自己係在職媽媽，有時返工返嚟已經攰，夜晚又瞓唔到，都曾經試過半夜時嬲嬲地同女女講 "再喊媽媽唔錫你架喇"，每次講完第二日諗返都覺得自己好唔啱，點解唔可以再俾多少少耐性

跟住無意間睇到Catherine嘅免費專頁，明白多咗少少女女瞓得唔好嘅原因，但都唔太知要點去改變，又怕去咨詢做睡眠訓練，因為我曾經覺得做睡眠訓練就等同要唔抱女女，由佢喊，喊到攰就瞓，雖然自己並唔係偉大無敵嘅媽媽，但為咗女女開心，都唔介意自己瞓少啲，忍住捱過去

如是者，女女到9個月時睡眠情況有些許改善，隔日瞓得差咁，即係隔日可以休息吓，因為較之前好咗，所以更加無動力話要去做睡眠訓練

但就喺呢個時候，Catherine介紹呢個網上睡眠調整課程，因為唔係直接咨詢，所以好似無咁大壓力話一定要做改變 (嗰刻我認知裏嘅睡眠訓練仍然係要bb勁喊嘅)，所以本住聽吓無壞，最多聽完唔跟，同時並唔期望上完堂會有咩大轉變嘅心態下，報讀咗呢個課程

然後神奇嘅事就發生喇，喺短短嘅五日，只係稍作改變，我女女夜晚瞓覺情況顯著改善，9點入睡後，到11:30 dream feed時喊一喊，跟住瞓到4/5點醒輕輕氹返瞓就ok，而且過程中並無需要由女女喊

另外，我知道女女應該要早啲入房準備瞓嘅，但放工返嚟沖涼再同佢BLW加自己食晚餐，往往最早要到8:25先入房，因為睡前奶喺廳飲，飲完入房女女仲好興奮，要搞好一陣先可以平靜返，再抱抱放床瞓，但衡量過實際運作情況，覺得並未有空間去做改變

呢個weekend因為前嗰幾日嘅成功令我都想試吓早啲瞓係咪真係瞓得好啲，同時我都改咗入房飲睡前奶，我就提早20分鐘，即8點帶女入房飲奶，再刷牙著睡袋，輕輕抱到平靜就放床拍patpat，女女開初都仲要掙扎一下，但已比以往輕微同時間短，由飲奶到瞓著大概25分鐘完成，半夜仍會醒一兩次，但11:30餐dream feed飲少咗同第二朝6:30餐奶推遲到7:30，之前因為女女太早醒無人手照顧佢，佢飲完早奶就要氹佢瞓，即使知道唔係好習慣，但無奈地仍然要繼續，但呢兩日嘅成功令我覺得有希望可以再作改變

Catherine曾經講過應該將bb睡眠一事睇得比其他方面更為重要 (好似話係首位)，嗰時睇到並未有太大認同感

但經過呢一星期，我今朝瞓醒就同屋企人傾，我嚟緊weekdays仍然會嘗試8點就帶女入房，先陪咗佢瞓，之後我再食晚飯

完咗呢個課程後，我會再番睇返啲片，真係太有內涵喇，要睇多幾次先能夠明白晒，希望嚟緊可以同女女戒咗11:30m餐奶，另外，小睡方面亦希望會有進步，現時即使計好清醒時間，但仍然瞓得短，好似今日女女7:45醒，我10:00安排佢瞓，佢10:15入睡，準時10:45醒

最後，我想借寫呢篇文提醒自己，學習睡眠方面嘅知識當然重要，但點樣調整自己嘅心態同樣係好重要嘅，有一段時間，我好怕夜晚帶女入房瞓，而且當佢瞓咗，我完全唔敢離開間房，隨時準備佢喊醒氹返佢瞓，但現時唔同喇！