Dolce Sleepers嘅獨門心法，其實唔係人人都啱用…

每講到育兒問題，總會有人話：一本通書唔能夠睇到老

嬰幼兒睡眠亦一樣，有好多唔同嘅方法。

只不過，坊間好多所謂絕招，都冇任何科學根據，甚至去到迷信嘅地步

睡眠其實係科學嚟，想BB瞓得好，就必須對人體晝夜節律生物學，以及嬰幼兒睡眠科學有基本認識。

尤其是，如果你打算同BB戒奶睡抱睡，我非常建議要睇多啲唔同嘅資料，瞭解各種方法嘅利與弊。

因為，沒有最好，只有最適合。

例如，DolceSleepers獨門心法建基於RIE育兒法，講求以sensitive及responsive嘅心態去回應BB。

呢個做法，其實唔係人人都啱。

因為，你需要用心去觀察BB，有耐性去慢慢瞭解BB想向你表達嘅訊息，從而摸索出點樣至係最恰當嘅處理方式。

簡單嚟講，搵我做睡眠訓練嘅話，我唔會叫你睇實個鐘，話你知要等幾多分鐘至去安撫BB...

因為，我相信視乎BB嘅需要，以及當時實際嘅情況去作出回應，至係「尊重BB」嘅做法。

呢套方式唔容易去做，但只要你掌握到重點，之後好多問題都會能夠識得靈活處理，唔會因為冇人話你知要點做要手忙腳亂，不知所措。

所以，如果你希望可以有一套簡單嘅方式，跟住做就得，或者有人講晒你知點做點做，等你唔駛用腦去諗嘅話，咁Dolce Sleepers嘅方法就唔係咁適合你嘞

雖然係咁，但我明白好多媽咪爹哋喺長期睡眠不足嘅情況之下，的確冇心力去做太複雜嘅事。

所以，本住推廣健康睡眠呢個目的，只要使用合乎BB月齡及發展嘅睡眠訓練方式*，其實我都會好樂意同大家分享。

一般常見嘅睡眠訓練方式，尤其有書作參考的話，都會有一個清晰嘅架構，話你知點處理。

所以，跟住做其實都已經可以，唔係一定要畀幾千蚊去搵人幫你BB做睡眠訓練（顧問嘅角色有時喺心理支援上更重要）

重點係，你要知道邊個方式會最適合你同BB，而唔係單單睇一本書就跟住去做。

係，結果都係生仔要讀書

知嘞，我幫你做埋功課啦！

*P.S. 極度唔建議為未滿6個月嘅BB做正式嘅睡眠訓練，要求佢能夠戒埋夜奶一覺瞓天光，因為咁細個BB好多時生理上仍然需要夜奶，所以想BB連睡12小時係不合理嘅期望，掙扎會大好多...