點解越氹越喊？應該點做？

我請一位搵我做電話諮詢嘅媽咪，將氹BB入睡嘅情況錄低send畀我睇睇。

BB一被放低喺床仔，就喺度𠵱𠵱呀呀。

而大人嘅回應方式，係典型唔想BB喊，想令佢開心，所以會話冇事冇事，會不斷拍同掃BB背脊，總之就係用盡方法，去制止BB發出「喊聲」。

不過，BB仍然繼續間唔時就呀呀呀，大人一聽到就即刻同BB講唔好喊，嘗試用愉快嘅語氣去同BB講hello，甚至捉住BB隻手同佢數手指玩。

最後，BB越喊越大喊，越喊越激動...

點解氹極都唔得，仲喊得更大聲呢？

其實，BB未識講嘢，所以佢只能呀呀呀咁樣去表達佢嘅意思，同我哋溝通。

我睇條片時，見到BB一開始係冇喊，只係呀呀呀咁表達緊佢自己，可能係講緊‘抱我’，亦可能係講緊‘你同我著睡袋’，或者‘我知道要瞓覺嘞’，甚至係‘終於有得瞓嘞，我好攰呀！’

但好多時大人因為驚BB喊，所以就會忽略BB嘅‘說話’，淨係猛咁shuuu或拍，甚至用遊戲企圖令BB收聲。

但當BB佢表達緊一樣嘢，大人冇作出相對嘅回應，BB覺得大人唔明白佢，就會炆憎唔高興，於是就更加大聲，更加激動，最後真係變成喊...

之前我喺專頁曾經分享過幾篇有關情緒嘅文章，重點係：大人對於哭泣嘅心態，同埋處理方式，對BB嘅情緒健康非常重要，亦係BB建立安全感嘅重點。

至於實際嘅執行方法，我會建議先用同BB講一聲，指住張床畀佢睇，然後至慢慢放低。

唔需要一放低就不斷去掃背，亦避免用‘愉快’嘅聲調同BB講hello，亦唔好捉佢隻手同佢數手指。

只需要望住BB，佢呀呀呀你可以回應佢‘係呀，係時候休息嘞，我會喺度陪住你’，講得越慢越悶越好。

有需要亦可以放隻手喺BB心口，重點係要同BB保持連結，保持雙向溝通，而唔係大人一味講一味做好多嘢。

試諗諗，你想BB瞓覺，但仲同佢玩，同佢講hello，只會令BB好混亂，唔知你哋想點呀...

#唔好用機械方式去氹BB

#細心觀察耐心回應

#至能夠令BB安心