小朋友唔願瞓，請先瞭解係乜嘢原因，唔好淨係諗住做睡眠訓練去改變小朋友嘅行為

早幾日收到一位媽媽嘅求救，覺得好心up...

小朋友已經2歲幾，最近瞓覺唔畀媽咪閂門，於是呢位媽媽搵咗個睡眠顧問幫手，得到嘅建議係直接閂門出房，隔幾分鐘至入房安撫呢種稱為leave & check嘅睡眠訓練方式...

過咗幾日，係就係可以順利閂到門，小朋友亦冇再喊...

但佢發現小朋友越嚟越唔肯講嘢，又成日啜手指，甚至會叫媽咪走開，有事都唔再出聲求助...

媽媽好擔心，想放棄睡眠訓練，甚至諗緊係咪需要帶小朋友去做counselling...

其實，經常都有媽咪問我，小朋友好夜瞓／唔肯瞓／夜醒等等，仲可唔可以做睡眠訓練去解決睡眠問題。

我嘅答案係：唔同年紀有唔同處理方式，年紀越大，心理因素影響越大，並非單單做睡眠訓練，以改變小朋友行為為目的，就可以令問題得到解決。

而且，年紀越大，事前準備時間越長，並且必須要先同小朋友溝通好，加上父母對睡眠及幼兒發展有一定認識，瞭解係乜嘢原因導致睡眠問題，咁至可以制定出真正有效嘅全盤計劃，唔會令小朋友失去 安全感，影響親子關係。

講返呢個case，其實小朋友唔肯畀媽咪閂門嘅原因，應該係一個好典型嘅發展階段 -- 當小朋友去到2.5歲左右，想像力激增，於是喺黑暗嘅環境睇唔到嘢，就會諗係咪會有怪獸或其他睇唔到嘅嘢喺房（孖仔A曾經同我講話spiderman阻住佢瞓覺）

係，其實即係 怕黑。

雖然小朋友未必會表現出好驚嘅樣，但佢會感到不安，於是唔肯畀大人熄燈／閂門／離開睡房等等（建議處理方式見blog post）

面對呢個情況，小朋友需要更多安全感。所以夾硬閂埋門嘅做法，其實正正令小朋友更不安。

根據 安全圈養育 嘅睇法，就係大人離開咗個安全圈，令小朋友失去依靠，於是唯有自我安撫，導致親子關係破裂...

所以點解我喺睡眠以外，仲睇咁多育兒理論，就係因為我察覺到，瞭解嬰幼兒發展，同埋佢哋嘅心理，對解決睡眠問題非常極之重要。

睡眠顧問嘅職責，唔應該淨係叫人做睡眠訓練，而係應該耐心聽媽咪爹哋形容佢哋同小朋友嘅情況，再去判斷出問題所在， 以提供最配合到呢個家庭嘅初步＆長遠建議。

一個成日話唔需要做睡眠訓練嘅睡眠顧問字

P.S. 講返清楚啲，其實我並非唔贊成做睡眠訓練，我都有幫好多家庭做「睡眠訓練」，但目的係 訓練大人，幫佢哋學識聆聽同瞭解BB嘅真正需要，再作出恰當嘅回應。

只要以 responsive 及 sensitive 嘅方式去回應BB，無係留房或離房，都能夠為BB提供情緒支援，咁就唔怕會令BB失去安全感，甚至能夠令大人覺得同BB關係更緊密。

講多句：過咗1歲我亦唔會再建議用離房嘅方式去戒抱睡奶睡，因為怕小朋友會爬出床跌親；而且小朋友已經唔再係BB，佢哋明白嘅事遠比我哋想像中要多。所以，我只會以逐步減低存在感嘅方式，令小朋友慢慢適應轉變，可能小朋友都會喊，但點樣盡量減少掙扎，用點樣嘅心態陪住小朋友，係重點所在。

#用行為訓練去改變小朋友已經好落後

#瞭解小朋友嘅諗法

#瞭解行為背後嘅成因

#容許情緒宣洩

#以幫助小朋友渡過難關嘅心態

#同小朋友結伴走過困境

#至能夠真正令問題得到改善

#無論係睡眠定一般育兒問題其實都一樣

唔想錯過正向睡眠及教養文章分享，立即加入whatsapp群組啦！