10大睡眠誤解(上)

喺香港，雖然專門講解嬰幼兒睡眠嘅平台得好少，不過周不時都會見到有啲育兒媒體，或者親子博客KOL分享佢哋嘅「絕招」，只要跟住做就可以令BB一覺瞓到天光云云...

呢啲所謂嘅分享，得罪講句，唔知就會覺得好似頭頭是道，但只要對嬰幼兒睡眠有基本認識，就會知道當中其實有好多誤解！

今日就同大家講吓，10大睡眠誤解（所有斜體字都可以click，睇返相關嘅文章）：

1. 臨瞓畀配方奶可以頂到耐啲

英國有一項研究亦發現，有68%嘅BB喺3個月大時，已經能夠連睡5小時。而呢個比率，無論BB係親餵或食配方奶都冇分別。所以，無論親餵🤱定配方奶🍼，本身對BB嚟講其實冇乜分別。咁到底係乜嘢分別，令BB唔會一晚夜醒大喊幾次呢？呢篇文章話你知！

2. 早啲開始加固可以快啲一覺瞓到天光

肚餓係夜醒嘅其中一個主要原因。BB喺6個月大之前，生理上仍需要夜奶，多數要到9個月至會完全停止夜奶。但咁並唔代表，食得飽就會瞓得好... 好可能只不過係時間上咁啱吻合而已。而且，加固後由於BB嘅用餐及作息時間表出現改變，甚至有可能令BB瞓得更差！Click呢度知道更多

3. 夜晚遲啲至瞓

好多人以為，只要畀BB近半夜12點至瞓，咁佢就可以瞓到天光。但所謂嘅天光，好多時其實只係餵完奶後再瞓過... 呢個其實係非常唔健康嘅做法，長遠亦只會令媽咪更辛苦（BB瞓咗至有me time，然後6點又要抱B餵奶。就算一直喺床都好攰啦...）畀BB喺返配合到佢生理時鐘嘅時間瞓覺，BB至能夠瞓得好，連睡11-12小時係可以做得到㗎！睇睇呢位媽咪嘅分享啦！連結：《朝八晚八不是夢》

4. 播催眠曲幫助入睡

顧名思義，催眠曲嘅用意係用嚟幫BB入睡嘅。對於部分BB嚟講，或者會有鎮靜嘅作用，因為音樂聲會吸引BB嘅注意力。只不過，係咪幫到BB入睡，就比較難講，因為對大腦極度活躍嘅BB嚟講，音樂其實有一定刺激性，而且BB半夜醒咗冇音樂聽，有可能會比較難瞓得返。咁乜嘢聲音／音樂，至能夠真係幫到BB呢？Click呢篇文章就知！

5. 瞓喺床扮瞓覺唔理BB

對於比較大個啲小朋友，呢招係常見嘅「陪睡」嘅方式，如果父母唔介意喺房同佢困獸鬥，或者小朋友好快就瞓著嘅話，咁就唔係問題。只不過，好多媽咪同我講，明明已經陪住BB，開頭落床都冇乜嘢嘅，但過一陣佢就開始喊，跟住越喊越勁，情緒性失控... 想知點解就即刻睇呢篇文章啦！連結：《點解陪睡都會大喊?》

伸延閱讀：10大睡眠誤解(下)