BB一入房就爆喊

有媽咪問

「次次抱BB入房做睡前儀式，佢都會大喊，好似好唔鍾意間房咁...

BB越嚟越大個，會對周邊環境越嚟越敏感。」

有些BB前一秒仲玩得興高采烈，但當你帶佢入房開始睡前儀式時，佢就會立即爆喊

呢個情況令各好多父母都覺得好煩惱，但其實係一個好好嘅徵兆嚟㗎！

因為，咁代表你囝囝囡囡已經明白到，當睡前儀式開始，就係準備瞓覺嘅時間嘞！

點樣可以令BB鍾意間睡房，唔會覺得係一個苦悶嘅「囚室」呢？

你可以畀囝囝囡囡喺朝早醒咗之後，或者夜晚就寢前，陪佢喺睡房入面玩。

準備一啲特別嘅玩具，只能喺房入面至能夠拎出來玩，令佢知道睡房都係一個好好玩嘅地方，就自然唔會咁抗拒留喺睡房啦！

除此之外，就寢前30分鐘應該將燈光調暗，令大腦能適時分泌睡眠荷爾蒙褪黑激素（melatonin ），到夠鐘要瞓時，BB至會有足夠睡意。

當BB喺房入面玩時，你可以單單調暗睡房內嘅燈光，咁樣就唔怕影響到其他未夠鐘瞓覺嘅家人啦！

喺睡房內玩，亦能避免BB嘅大腦受到電視或手機等電子屏幕所刺激，影響睡眠質素。

對於忙碌嘅家長而言，呢個亦係一段寶貴嘅親子時光