想囝囝囡囡瞓得好，心態比方法重要

點樣令BB瞓得好呢？

除咗知識外

心態都極其重要

今日想同大家講講，我對於嬰幼兒睡眠嘅理念

先簡單自我介紹一下，我係Catherine，育有一對啱啱4歲嘅孖仔。

由於我唔係住喺香港（所以你見我覆message嘅時間係下晝到半夜 ），奶奶嗰時又未退休，所以我係一打二嘅全職媽媽嚟

冇人幫，又乜都唔識，所以我喺孖仔出世之前，就已經開始刨書同上網睇資料，學湊B。

當然，無論你睇幾多書都好，初生BB嘅設計就係令父母冇覺好瞓嘅，所以頭3個月我完全係一隻喪屍嚟

之不過，正因為我要一個湊兩個，根本冇可能成日兩個一齊抱，加上喺佢哋3個月大時接觸到RIE育兒法，明白到要畀BB多啲自由活動嘅時間，避免令佢哋受到太大刺激。所以兩個囝自細就已經習慣食飽就返落床自己玩，玩到咁上下就自己瞓著覺。

當然，唔係真係咁順利啦！佢哋都有喊㗎，邊有BB唔喊嘅先？但RIE教識我要先觀察BB，嘗試瞭解佢喊嘅原因，而非見佢喊就即時抱起佢，用盡所有方法試圖停止佢嘅淚水。

就係呢個心態，令我觀察到我其中一個囝囝有段時間經常喺床喊，原來係因為佢練習緊翻身 -- 其實佢唔係喊，佢係用緊力！

因為當佢停落嚟嘅時候，就唔會再「喊」，只有用力拗晒腰抬起腳想翻身時，至會喺度出盡力嗌。最後佢喺未夠4個月（更正齡2個半月）就已經成功自己翻身，從此冇再咁樣喊嘞！

當然，佢哋都會有瞓唔到大喊嘅時候，但又係因為我冇可能一個抱兩個氹佢哋瞓，所以只能拍睡。你或者會問，點樣同時拍兩個BB呢？哈哈哈！呢個係我嘅絕招 -- 大鵬展翅！歡迎自己想像一下

Anyway，孖仔習慣床上入睡，睡眠問題自然少啲，未夠5個月就已經連續瞓到10個鐘（一次dream feed），我亦正式脫離喪屍嘅行列

又當然，事情唔會咁美好嘅... BB唔係機械人，間唔時都會瞓唔到瞓唔好，情況總會有上有落。我都試過半夜瞓地下陪睡，甚至試圖抱上大人床（但佢只會覺得好好玩，冇意欲應該要瞓 ）。其中一個亦曾經因為支氣管炎完全瞓唔到覺，結果抱咗幾日。

但當你發現咁做唔work，甚至更worse嘅時候，你就知道唔可以再咁樣繼續落去，必須要作出改變。

呢個位講嘅係決心，只要我哋大人能夠貫徹始終，保持一致，咁至能夠畀到清晰嘅訊息囝囝囡囡，令佢明白我哋嘅期望同安排，咁就唔再需要測試我哋嘅底線。

加上以responsive嘅方式，視乎情況去作出唔同嘅回應，令囝囝囡囡感覺到你有去聆聽同瞭解佢嘅真正需要，咁佢自然會生出安全感，能夠安心瞓覺啦！

所以，喺專頁除咗分享嬰幼兒睡眠資訊之外，我亦周不時會quote一啲發人深省嘅說話，希望可以慢慢令你哋畀我洗腦（誤 ）

開始有啲語無論次，我都係去瞓先嘞