唔瞓晏覺，會令BB學習能力下降，小朋友記性變差

日頭瞓得好，唔單止能改善夜醒嘅情況，而且仲可以提升BB嘅學習同記憶能力！

曾經有唔同嘅科學研究都同時指出，小睡充足對大腦發展嘅正面影響。

德國腦神經科學家Manuela Friedrich曾進行一項研究，邀請咗90位月齡介乎於9至16個月大嘅BB，畀一啲陌生物件嘅圖片佢哋睇，再作一個名畀呢啲物件（確保BB對聽到嘅聲音完全陌生）。

佢哋同呢啲BB戴上腦神經探測儀器，去檢視BB大腦對呢啲物件及聲音嘅反應。

結果發現，瞓醒晏覺嘅BB，能夠記得呢啲物件嘅名稱，但冇瞓晏覺嘅BB就唔會記得。

除此之外，研究仲發現，有瞓晏覺嘅BB，見到類似嘅物件仲識得分類添！

另一個由美國認知腦神經科學家Rebecca Spencer以及佢嘅學生Sanna Lokhandwala所進行嘅研究，係同一批3至6歲嘅小朋友睇書講故事，然後試吓佢哋記唔記得故事嘅次序。

同樣地，有瞓晏覺嘅小朋友，答案準確好多，而且到第二日問返佢哋個故事都仲記得。

所以，無論係BB定小朋友，其實都好需要瞓晏覺，仲需要瞓得充足。

一般建議起碼3歲至停止瞓晏覺，有啲小朋友甚至瞓到5-6歲添！

當平時瞓開晏覺嘅BB/小朋友，有一日冇瞓到嘅話，佢哋嘅認知能力就會受損 -- 朝早學完嘅嘢好快就唔記得...

如果你好注重囝囝囡囡嘅學習能力，想佢哋學多啲學好啲，要做嘅並非同佢做多啲練習，或者報幾個playgroup，而係畀佢每日定時定候瞓晏覺！

想囝囝囡囡瞓得好，正如 雨僑 Ava Liu 喺podcast訪問時所講，真係要將個priority放高啲，編排活動時要顧及BB嘅睡眠需要，唔好為咗去街而令佢冇得瞓。

另外就係要對嬰幼兒睡眠有基本認識。

小睡最常出現異常狀況嘅月齡，係1歲同2歲呢兩個階段。

1歲時可能會因為BB拒絕第二次小睡，而過早轉1覺（一般建議滿15-18個月至轉）。

2歲時就好多時都會因為小朋友掛住玩唔肯瞓，就停止唔再瞓晏覺。

另一個情況係，小朋友要開始返學。因為要返下午班而令小朋友提早停止午睡，或瞓得唔足夠。

呢個情況，其實對小朋友嘅大腦發展係一件非常差嘅事嚟，但好奇怪喺香港呢個咁注重學術能力嘅地方，竟然會有一個咁唔科學，咁唔健康嘅風氣

可以嘅話，其實等小朋友3歲至開始返學，無論對佢哋嘅腦部發展，仲有情緒及社交能力，都更加理想，小朋友亦都容易啲適應啦

P.S. 當然明白香港好多雙職父母，日頭自己湊唔到嘅話，送返學可能係比較理想嘅做法

再P.S. 但其實最大問題係點解啲幼稚園開咁多下午班，但上午班供應不足，我冇乜聽過其他國家嘅幼稚園會有下午班呢樣嘢囉其實

資料來源：How learning happens in the brains of sleeping babies

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享