救命帳幕點樣拯救我同仔仔？

話說，上星期靈機一觸，買咗個帳幕畀孖仔，終於能夠有返個安寧嘅下晝...

到底發生咩事呢

事源，孖仔之前嗰間學校返咗2個月後，因為omicron爆得好勁，加上我對間學校好失望，所以一直曠課...

直到2月尾，孖仔爸爸話係時候再返學嘞，於是同佢哋報咗一間nature school，除咗打風落雨外，其他時間都係喺戶外活動嘅學校。

於是，孖仔每日放學帶返屋企嘅係，除咗10隻捆晒黑邊嘅手指甲外

仲有就係異常地差嘅脾氣

有次接放學，仲喺學校門口，兩個已經喺度嗌晒交，佢哋從來未試過喺街鬧交發脾氣㗎囉 （不過最後係和氣收場嘅 ，有機會再分享 ）

當然，兩兄弟嘈交係正常嘅事，但通常都係得個嘈字，然後又好快再攬頭攬頸。

但開始返返學後（中間因為病停咗2個星期），佢哋係去到邊個行入屋企先都會崩潰嘅地步，甚至出現返咬人嘅情況（好耐都冇試過！）

我知道個原因，就係 -- 攰得滯

有次我食完lunch，同一位媽咪傾緊電話，孖仔A食完後爬咗上嚟我度，好似BB咁將個頭放喺我手臂上，然後 -- 瞓著咗

佢哋已經停止午睡超過兩年囉，嗰吓我知佢真係好攰...

我試圖將孖仔A放喺梳化，不過整醒咗佢 ，然後佢用被冚住自己，仲想繼續休息。

就係呢個時候，我諗到買個帳幕畀佢，可以阻擋到環境刺激，畀佢喺一個cozy嘅地方休息吓。

問題係，孖仔爸爸已經成日投訴屋企太多嘢（其實我已經極少買玩具 ），所以必須要搵個方便開閂嘅款式。

於是我揀咗個海盜船款嘅pop up帳幕，一秒開2秒閂，入面再放張軟綿綿嘅被...

自此食完飯，孖仔A就會爬入去，雖然冇瞓著，但佢會拎住塊變色畫版，自己設計遊戲玩，攤1-2個鐘（安靜時間），然後出返嚟同我講佢休息完。

有時孖仔F都會入埋去，兩個喺入面傾計，有時唔知講乜嘢笑到咔咔聲

我終於可以有返啲安寧嘞~~~

成日聽到有人話，小朋友要放電至瞓得到...

的確，攰到斷電嘅話，入睡掙扎係細好多嘅（而家孖仔夜晚都超快瞓著，以前未想瞓會用拖延法，又要加水又要整返好張被...）

但係，當小朋友放電放到攰得滯，同時會帶嚟嘅，係隨時爆發嘅情緒，仲有咬人打人等不當行為，都會一齊爆埋出嚟

所以，我從來唔會建議放電 --「攰啲就瞓得好」係完全錯誤嘅concept嚟

我最多會建議畀BB有多啲時間喺地下自由活動：

唔好成日將BB放喺餐椅或搖搖椅一類，會限制活動能力嘅裝置；但同時亦唔需要諗好多活動去引BB爬嚟爬去。

畀BB自己選擇想點樣郁、玩乜嘢，點樣玩。

當佢有精力時，自然會爬嚟爬去走嚟走去；當佢攰時，自然會坐低靜靜哋玩。

容許BB/小朋友跟隨自己身體嘅需要去活動，就已經足夠，唔需要特登要去放電（而且對BB嘅身體活動發展最有利添！）

希望BB/小朋友瞓得好，你要做嘅係移除阻礙入睡嘅因素、令佢有穩定嘅作息時間，同埋鍾意瞓覺，睡眠問題自然就會得到改善。

所以，請唔好諗住拖到清醒時間好長，或者夜啲畀囝囝囡囡瞓，就可以解決到睡眠問題

當BB攰到斷電，入睡係冇乜掙扎，但疲勞過度會令佢夜醒早醒，就算能夠自行入睡都會自己瞓唔返而爆喊，你想氹佢瞓返都唔係咁容易

就算初頭好似冇乜嘢，但夜間睡眠時數不足（少過10.5小時），會慢慢再次積累睡眠債，過一排睡眠問題就會再次浮現...

你試過聽人講話畀BB放電，結果對BB嘅睡眠情況完全冇幫助，甚至仲瞓得差咗嗎？歡迎留言分享！

P.S. 本月專題zoom class開放報名中

《跟BB對話：減低育兒掙扎的竅門》

歡迎pm專頁索取詳情

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

安全睡眠ABC