BB突然分離焦慮，情況好嚴重，瞓覺時成日捉住大人唔放手，應該抱住先，定做睡眠訓練呢？

有媽咪問：BB一向都瞓得唔錯，但最近分離焦慮突然好嚴重，影響埋夜間睡眠。日頭瞓得越嚟越短，夜晚亦開始不斷夜醒，次之醒咗都爆喊，要抱住先停，其間一直捉住大人好驚我哋會走，想試吓放低喺BB床就即刻喊得好緊不斷尖叫... 應該抱佢陪住佢等情況自然過渡，定係做睡眠訓練令佢習慣返自己瞓覺呢？

答：喺歸咎於「分離焦慮」之前，我會先諗諗係咪有啲乜嘢需要調整，例如作息時間表，以及睡前儀式。

當你見BB喊，就認為係分離焦慮，會令你覺得情況冇得控制，於是喺抱同唔抱之間掙扎，然後望天打卦，希望情況快啲過去。

但退返後一步先，諗吓會係乜嘢原因，令BB覺得不安，冇辦法可以自己安心入睡。咁樣至可以有方向，有計劃去做改善。

的確，有時候係需要設限。只不過，如果真係有啲嘢阻礙BB，設限並不能幫助BB感到安心，反而會令佢覺得不被明白同諒解。

瞭解BB喊聲所表達嘅意思，係我非常重視嘅一點，只有咁做至能夠真正滿足BB嘅需要。

所以我從來唔會建議「等幾多分鐘至入房安撫幾多分鐘」呢種做法，雖然執行上比較容易，但因為並非由BB嘅角度出發，亦會令大人失去聆聽同瞭解BB，從而學識點樣作出回應嘅機會。

長遠其實可能會令大人更難明白小朋友想表達嘅意思，甚至令小朋友失去表達自己嘅慾望。

我明白有啲家庭會選擇用ferber一類，睇住個鐘決定幾時入房安撫嘅睡眠訓練方式，亦的確好多家庭係從此有覺好瞓（但亦有好多BB就算做完後能夠自行入睡，但仍然有夜醒早醒問題）。

但我希望做到嘅係提供另一個perspective，幫助大家以更宏觀嘅角度去睇睡眠問題，而唔係單單以點樣令BB入睡為目標。

最後，我要重申，親子關係模式同BB嘅安全感，並唔會單單會被入睡前嘅哭泣所影響，而係全日大人喺照顧BB時嘅互動所慢慢建立。

所以，我尊重每個家庭嘅選擇，但如果睡眠問題喺完成睡眠訓練後仍然持續，咁就必須退返後一步諗諗係邊度出問題。需要幫手可以隨時同我聯絡