專家教安撫BB嘅方法點解唔work？

喺我嘅認知之中，RIE育兒法 同 5S安撫法喺育兒理念上非常唔同。

因為5S安撫法只視嬰兒為「物件」，而且只著重於停止哭泣，同RIE尊重BB為一個完整嘅人，建議觀察及聆聽BB需要嘅心態有抵觸

其實，安撫BB嘅方法，來來去去都係嗰幾種。

所以，對我嚟講，最重要嘅係照顧者喺安撫BB時嘅心態。呢點係好多媽咪爹哋冇諗過，甚至唔知要去諗嘅事...

冇人會鍾意聽到BB喊，情緒係好容易受觸動，而出現煩躁、不安、憂慮、自責等感覺。

安全圈 稱呢個情況為大腦響起咗 鯊魚音樂，即係喺一個安全嘅情況下有不安嘅感覺（絕大部分時候BB喊，都唔係真係有危險嘅情況發生）

為咗消除不安感，我哋就會做出自我保護行為。喺呢個情況下，即係立即用盡方法去停止BB嘅喊聲。

5S安撫法之所以受歡迎，係因為好簡單咁畀5個招式家長跟住去做，一招唔得就試第二招，試到得為止。

呢個係好「正常」嘅做法。

但 RIE育兒法 冇咁表面。

當我哋單單以停止哭泣為目的，就好易會忽略咗BB想從哭泣中表達畀我哋知道嘅意思，佢嘅真正需要。

RIE育兒法 及 安全圈教養 都強調觀察及聆聽BB，藉以瞭解BB嘅需要（安全圈分為10種需要），然後至可以作出恰當嘅回應方式，令BB感到被明白，需要被滿足。

呢個係大人同BB之間建立安全型依附關係係基礎（secure attachment），講求嘅係心靈及情緒上嘅同步。

所以，當BB大喊嘅時候，只要唔係生理上有需要未被滿足（例如肚餓或條片唔舒服，當然立即幫BB解決咗先），我哋其實唔需要急於去令BB停止喊（pushing child to feel ok），而係應該去同BB嘅情緒同步（being with），從而幫佢整理情緒（organize my feelings） 。

講緊其實可能只係多一兩分鐘，諗吓點解BB會喊，再用compassionate嘅方式去回應 （RIE有一套處理哭泣嘅方法叫 CALMS）

講係咁講，當我哋大腦不斷響起 鯊魚音樂 呢個令人好唔舒服嘅感覺，仲要去要求自己保持平靜，面對自己嘅不安，再選擇滿足BB真正需要嘅做法，係好唔容易嘅一件事

所以，我相信呢個係5S安撫法嘅優勢，藉住分享安撫方式，令新手父母能有所依靠。

5S安撫法並唔係錯，畢竟育兒方式並無對錯之分（除咗會導致危險嘅情況外）。

我只想指出，多數人面對緊BB成日喊嘅問題，都只會想要一個快靚正嘅解決方法，5S安撫法其實啱晒一般嘅家長。

但實行5S安撫法嘅同時，需要有其他做法配合，包括要去觀察同聆聽等等做法，呢啲做法相對5S安撫法嚟講冇咁簡單直接，所以好容易會被忽視或忘記。

然後，學咗呢啲招數嘅媽咪爹哋，亦會期望用呢啲方法就能夠令BB停止哭泣。

問題係唔一定會work（work嘅定義係停止哭泣，但呢個其實並非安撫BB嘅唯一目的... 呢個又係另一個大題目，有興趣知多啲嘅就留言話我知啦 ）

當用咗專家教嘅方法，都唔能夠成功令BB停止哭泣，好可能反而會令父母內疚，覺得自己做得唔夠好... 我好肯定呢個係語嫣唔想見到嘅後果。

P.S. RIE育兒法 同 安全圈 嘅育兒理念，係希望令BB能夠擁有健康嘅情緒發展。唔係單單追求開心快樂，做個「正面」嘅人，而係能夠識得點樣面對各種正面及負面嘅情緒。