放完電就瞓得好？

「放完電就瞓得好？」

小朋友喺戶外活動，曬吓陽光，對佢哋發展有一定益處。

只不過，好多家長會發現，囝囝囡囡「放電」後，一晚仍然會醒幾次...

乜唔係玩得夠攰，放晒啲電就會瞓得好㗎咩？

其實，要令囝囝囡囡容易啲入睡，兼且瞓得穩瞓得好，最重要係作息定時，畀佢每日喺同一個時間起身同瞓晏覺，夜晚亦應該喺差唔多嘅時間就寢。

而且，固定嘅活動模式，能令小朋友更有安全感。

嬰幼兒年紀仲細，仍未有足夠嘅自理能力，日常生活都需依靠父母或其他照顧者打點。所以，無論日頭定夜晚，瞓覺前做一個簡短嘅睡前儀式，能令佢哋預料得到，即將發生嘅日常活動及程序，就會覺得安心好多

除此之外，可預期嘅活動及程序，同埋充足嘅活動過渡時間（transition time），亦能有助減少嬰幼兒的反抗或挑戰行為，令佢哋更願意作出配合。

再講多一點 -- 2歲以下嘅嬰幼兒腦部發展極為活躍，好容易受到過份刺激。所以，一個熟悉嘅環境，能穩定佢哋嘅情緒，自然瞓得更安心更安穩。

咁應該點樣定立作息時間表呢？

首先要按照你囝囝囡囡嘅年齡，瞭解佢哋所需要嘅睡眠總時數，以及合適嘅清醒時間等資料，初生嬰兒要特別細心觀察佢哋嘅疲勞徵象。再配合屋企其他人嘅需要（例如其他兄弟姊妹），至能夠定立一個完全切合需要嘅時間表。

畀囝囝囡囡玩到冇晒電至瞓覺，雖然可能有助入睡，但亦可能會令佢哋過度疲勞，壓力荷爾蒙水平過高，無法銜接睡眠週期而頻頻驚醒㗎！

其實，要出街玩嘅話，最好喺朝早小朋友未係太攰嘅時候出去。就寢前一兩個鐘，就最好營造一個比較靜態嘅環境，燈光較暗少少，等小朋友慢慢平靜落嚟。仲有，千祈唔好臨瞓前睇電視手機呀！

好多人都以為，只要放晒啲電小朋友就會瞓得好，但結果往往相反

快啲share呢篇文章畀你嘅媽媽朋友啦！