點樣好好保護小朋友嘅牙齒？
除咗睡眠問題之外，湊小朋友其實仲有好多其他挑戰。牙齒健康，係一個好重要，但同睡眠一樣，並未得到足夠重視嘅問題。今集0-3歲寶寶podcast，我邀請咗牙醫學博士媽媽Melody，同大家講解，點樣好好保護小朋友嘅牙齒。
內容：
1) 每日早晚都有幫仔仔擦牙, 但係佢門牙仍然有好多污漬, 會唔會變成蛀牙呢？同埋有咩解決辦法呢？
2) 小朋友愛奶睡，點樣可以保持牙齒健康，其實早晚都有洗口，但洗完口又飲奶，有幾大問題呢？
3) 幾時要到牙醫度檢查牙齒？其實會檢查咩嘢㗎？咁細嘅BB點令佢放心開口比牙醫檢查，而不會做成陰影？
4) 乳齒不整齊，刷牙／日常生活點可以再做好啲？
5) 電動牙刷好唔好？
Click下面左邊嘅三角形箭咀，即能收聽（15:25）
文字版本請繼續拉到下面 👇
文字版本
C：Hello Melody。
M：Hello Catherine媽媽，Hello 大家好。
C：我知道你好忙呀，啱啱趕到返屋企都同我錄呢集podcast，好多謝你。
你之前曾經幫我dolce sleepers嘅專頁寫咗幾篇文章，講解有關於小朋友牙齒健康，點樣揀牙刷、牙膏，點樣令小朋友合作啲刷牙等等；我都好建議聽緊呢集podcast嘅家長可以搵返嗰幾篇文章睇睇。
呢集podcast我同一啲媽咪收集咗一啲問題，就想請Melody媽媽同我哋講解一下。事不宜遲，第一條問題就係：「佢每日朝頭早、夜晚黑都有幫佢仔仔刷牙，但係佢門牙仍然有好多污漬，會唔會變成蛀牙呢？有啲咩方法可以解決到呢？」
M：呢個問題其實都好常見，因為確實喺香港除咗帶個小朋友去睇牙醫之外，就冇一個比較好嘅途徑去知道點樣去幫小朋友刷牙。
首先你要知道點樣去分辨你個小朋友到底係咪蛀牙。其實小朋友，因為乳牙比大人容易蛀，所以佢一開始發展做蛀牙已經係會有白色比較暗啞嘅顏色喺牙齒表面出現，呢個已經叫做早期蛀牙。當佢真係一直冇刷好牙，唔理佢再發展落去，其實就會變咗淺啡色、深啡色，就開始蛀咗個窿咁，到時其實就只能夠補牙去處理。
所謂有污漬又係分兩大類，到底你個污漬係黃甘甘定係黑色一點點呢？如果黃甘甘嗰啲，其實已經係牙菌膜，需要通過刷牙去清除；如果係黑色一點點，係偏向食物色素嘅話，可能刷牙會難少少去刷走。
先講點樣去刷走牙菌膜，牙菌膜係會積聚喺牙齒同牙肉之間，所以要小朋友衣起棚牙畀你去刷確實有難度。所以家長要幫小朋友刷呢個牙齒，尤其係上面前門牙嘅時候，要真係掀一掀起佢嘴唇，幫佢刷好牙齒同牙肉之間嗰個位置，咁先至可以有效防止到蛀牙。
至於頭先講嗰啲黑色一點點嘅漬，因為小朋友嘅牙齒琺瑯質發育唔係想像中咁光滑，所以佢凹凸不平嘅位置容易卡住色素。因為除咗美觀關係，佢並唔係一個會引起蛀牙嘅問題，所以只可以通過刷牙去減少佢嗰啲黑色嘅一點點。
C：所以如果係一點點色素嗰啲其實就未必可以刷得甩嘅；淨係黃甘甘嗰啲，喺牙肉同牙齒中間嗰度嗰啲位，就可以勤力啲刷牙，咁就可以刷得甩。
M：冇錯。
C：好清楚。另外一個問題，好多媽咪都好注意嘅，有關睡眠嘅問題，好多時候如果小朋友係習慣奶睡嘅話，咁點樣可以保持牙齒健康呢？同埋其實佢朝頭早夜晚黑都有洗口同刷牙嘅，但係刷完之後又飲番奶，咁其實有冇用、有冇幫助呢？
M：其實小朋友夜晚半夜仲要飲奶，呢個都應該係大家嘅困擾。半夜要飲奶確實對牙齒健康做成威脅。
如果已經出咗牙嘅小朋友，佢單純靠洗口，用濕紙巾、濕巾或者手指頭牙刷去幫佢刷牙，個效果都未係非常理想。當然最好嘅就係一歲之後就戒咗夜奶佢；確實暫時未做到嘅話，我都會建議早啲去用有fluoride(氟素)嘅牙膏。因為我哋自己本身單靠刷牙其實冇辦法完全刷乾淨牙齒，都要靠氟素牙膏去幫助保護我哋嘅琺瑯質，有殺菌作用。
所以要幫小朋友，如果仲有夜晚瞓覺奶睡嘅習慣，就建議佢早啲用牙膏。
C：明白。我想針對呢個問題再問深入少少，其實如果係親餵、食人奶嘅小朋友，同埋食配方奶嘅情況有冇分別呢？抑或其實兩個情況對啲牙齒嚟講都唔好呢？
M：其實呢個喺上年嘅時候已經做咗一個大規模的研究。小朋友如果飲人奶超過咗兩歲，你都由得佢夜晚畀佢照食人奶嘅話，其實已經等同於佢飲配方奶，係一樣嘅。配方奶就係只要佢有飲，佢就會處於一個蛀牙嘅高風險㗎喇。
C：即係如果兩歲打後仲係半夜要奶睡或者食奶嘅話，對牙齒嘅威脅就更加大。
跟住另一個問題就係：究竟小朋友幾大個先至要去牙醫度做檢查牙齒呢？同埋檢查會做啲乜嘢呢？
M：我哋香港嘅牙醫嗰啲建議，係根據美國牙科協會嘅。美國牙科協會建議，小朋友其實有一隻牙就需要去睇牙醫㗎喇。
要檢查啲乜嘢呢？檢查項目包括：睇吓你出牙個狀況，出牙個位置出得好唔好，出牙嘅時間啱唔啱，同埋你口腔啲膜上面，會唔會有啲奇怪嘅嘢。
當然你會擔心，小朋友點會肯擘大口比牙醫睇呀？其實兒童牙醫比我哋想像中犀利，佢哋係通過遊戲嘅方式，去令到小朋友放心擘大個口畀你睇。一開頭第一次，佢未必會咁快話你聽：「你瞓上張床擘大口啦」，佢開頭會同你玩個遊戲，熱吓身先，同啲公仔睇吓牙齒先，以互動嘅方式去令到小朋友放下戒心，去畀牙醫去檢查牙齒。
所以我都幾建議家長同小朋友喺屋企可以多啲玩牙醫同埋病人嘅遊戲，去互相檢查牙齒，熟習一下先，可以令到個小朋友睇牙醫嘅時候，佢嗰個恐懼感冇咁大。
C：即係喺屋企做吓練習先：「好，我哋而家玩呢個牙醫遊戲，擘大口，呀——睇吓有幾多隻牙先，數吓先」。呢個都係一個幾好嘅建議。
但如果係咁樣嘅情況，我哋真係要搵返專門睇小朋友嘅兒科嘅牙醫先至OK？
M：其實唔係嘅，香港嚟講普通牙科醫生已經可以處理到㗎喇。同埋或者平時媽媽會一年洗一次牙，就不妨帶埋你嘅小朋友喺側邊觀察吓，睇吓媽媽其實都需要定期檢查牙齒，咁就叫醫生順便去幫我小朋友望兩眼，其實一般醫生都非常願意去做呢件事嘅。
C：呢個都係一個好好嘅建議，爹哋媽咪要去洗牙，帶埋小朋友去，咁就畀佢見到睇牙係一件點樣嘅事。呢個都係一個好嘅做法。
最後一條問題，如果小朋友出牙嗰啲乳齒唔整齊嘅話，佢哋刷牙嘅時候，或者日常生活，點樣可以再做好啲呢？
M：乳牙嘅排列其實係根據多數遺傳傾向。小朋友確實牙齒逼嘅時候，清理得唔夠徹底，會令到佢有口氣，同埋有蛀牙嘅風險。
小朋友其實喺美國兒童牙科協會都會建議用返牙線。咁的確係非常之高難度，你個小朋友一定要非常之配合，先會可以用到牙線。市面上有分牙線棒同埋抽出嚟一條牙線嗰種，兩種都得嘅。咁只能靠熟能生巧去做處理。
至於水牙線方面，其實咁細嘅小朋友係唔建議使用嘅。
C：咁大概幾多歲左右開始會建議可以用牙線呢？
M：其實小朋友只要有兩隻牙開始就可以用牙線㗎喇。
C：即係佢有條罅，咁就可以用牙線喇。
我諗到多一個問題，我之前有問過你，想請你講一講有關電動牙刷嘅問題。建唔建議用電動牙刷，或者幾多歲開始可以用電動牙刷呢？
M：傳統牙刷(即係我哋而家得一個方向刷毛嘅牙刷)，360度牙刷，同埋電動牙刷，其實做過研究，佢對於清除牙菌膜嘅效果係冇差別嘅；至於刷牙點樣會產生差別，就係在於你到底放個牙刷個角度啱唔啱。
所以小朋友咁細個嘅時候，係唔建議用電動牙刷，因為畢竟佢係自動郁嘅，好擔心佢會整傷啲牙肉。大概我諗都要八歲左右以上，先會建議去用電動牙刷。
當然我見到日本好多藥妝店都會有三歲或以上嘅電動牙刷可以買到嘅，我就會覺得，如果你想吸引小朋友用電動牙刷嘅，唔係唔可以，但係需要喺家長幫佢刷嘅時候先至用電動牙刷，唔好由得佢自己幫自己刷牙嘅時候用電動牙刷。
C：明白，因為可能小朋友太細個，佢拎住枝電動牙刷咁就掂咗喺度，如果唔係太識郁隻牙刷去刷嘅話，有機會可能傷害到啲牙肉。
好多謝Melody你今日解答咗好多媽咪嘅問題。最後你仲有啲咩貼士可以畀咁多位媽咪爹哋，點樣去保護好小朋友嘅牙齒健康呢？
M：首先我想分享吓刷牙嘅策略先。我自己幫我小朋友刷牙，就係朝頭早食完早餐先刷嘅，因為佢朝頭早起身可能心情都唔太好，等佢個人醒少少先幫佢刷。夜晚就一定係瞓覺之前幫佢刷，先至畀佢瞓覺嘅。
另外要講講就係刷牙嘅時候，其實小朋友點解唔鍾意刷牙，可能一係家長個技巧唔太好，刷得佢唔舒服。第二個可能就係因為佢有產生恐懼，你塞啲嘢入落佢個口度，佢覺得唔舒服。所以頭先我都提到，以遊戲嘅方式、有互動嘅方式去令到小朋友更加接受呢件事，聽歌、講故事、對住塊鏡刷，其實都係一個非常之好嘅幫助。小朋友由好細個、有牙齒嘅時候開始幫佢刷牙，到到佢大個，個接受度越來越高，刷牙呢件事就唔會變得好似打仗一樣。
第二樣就係點樣揀牙膏，市面上其實係有兩款牙膏，一個係xylitol牙膏，一個係fluoride牙膏。簡單分：一個吞得，一個唔吞得。xylitol牙膏吞得，fluoride牙膏唔吞得。
我哋最近做咗個研究，都發覺xylitol牙膏佢係可以有效防止小朋友蛀牙嘅。所以家長不妨喺小朋友出咗一隻牙嘅時候，已經用牙膏開始幫佢刷牙，咁成件事就會事半功倍喇。
用牙膏嘅份量，最緊要一開頭只係用非常之薄嘅一層，去試吓個牙膏嘅質地、個感覺，睇吓個小朋友嘅接受程度。
至於你個小朋友如果半夜仲要起身飲奶，刷牙唔係好配合，我就會建議早啲轉用fluoride牙膏，因為fluoride本身有防止蛀牙的效果。香港其實食水裡面係有加入fluoride，可以防止蛀牙。Fluoride其實雖然話唔吞得，但佢並非完全唔吞得。非常少量嘅fluoride吞咗入口，其實係會隨尿液排出。所以不妨幫小朋友刷牙，即使佢唔識lur出嚟，用濕巾將表面嘅抹走，殘留嘅fluoride停留咗喺牙齒表面，反而可以加強佢防止蛀牙嘅效果，所以大家不妨參考吓。
C：好呀，所以都係要用返有fluoride嘅牙膏先至最好。
好多謝你呀Melody，好多謝你好清楚咁解答咗好多媽咪佢哋嘅疑問。如果媽咪有其他題目嘅話，我就邀請你再錄多一集podcast啦。好多謝你，拜拜。
