唔想BB慣咗成日要抱要奶睡，但佢成日喊根本都放唔低...

最近多咗有關初生BB嘅查詢，好多媽媽嘅困擾，係BB成日喊，要抱住或啜住至瞓到，於是怕BB依賴咗會瞓得唔好，想知點樣可以唔駛抱，或者問有關睡眠訓練嘅諮詢資料。

BB喊有好多原因，但最常見嘅原因，係睡眠不足導致疲勞過度，即係BB攰得滯。

唔知你有冇試過，個人攰到唔單止冇晒力手軟腳軟，甚至攰到覺得個人好痛嘅感覺...

BB嘅體力好低，攰得滯覺得唔舒服，就會一直爆喊，要抱或啜奶，放低一分鐘都唔得（ 好多時會被誤解為BB缺乏安全感，其實唔係囉！）

所以，如果你好擔心BB慣咗要人抱至瞓到，令佢夜晚會不斷夜醒爆喊瞓得唔健康，影響BB嘅大腦及身體發育...

你要做嘅並非同BB做training，放佢落床唔抱，而係必須先掌握好理想嘅放床時間，同埋抱有正面及正確嘅心態。

有一點經常被誤解嘅係，其實未滿6個月嘅BB，對入睡方式未有好重依賴，未至於一定要抱睡或奶睡至瞓得到。

甚至好多大個啲嘅BB，其實都能夠接受唔同人用唔同嘅哄睡方式，例如媽媽要奶睡，姐姐要抱，爸爸就陪住已經得

所以，對於初生BB嚟講，只要營造好安睡環境，加上掌握好放床時間，就已經能夠提高BB喺床仔自然入睡嘅機會，即係佢自己喺床仔食吓手仔踢吓腳仔然後瞓咗

當然，未必每覺／每日都咁順利，只得0-5個月嘅BB，重點在於嘗試，瞓唔到大喊就抱返啦！下一覺至再試過，唔好勉強！

再提多次：只得3個月嘅BB，唔需要亦唔應該做任何睡眠訓練！（之前分享過一個令人好心up嘅case ）

咁究竟點為之放床嘅最佳時機呢？

預先有做功課嘅媽咪爹哋，都會聽過「食玩瞓」呢套做法，我喺健康睡眠工作坊 亦有講解。

不過要注重嘅係，呢個只係一個基本建議，冇BB會每日都完全跟到，所以千祈唔好淨係跟住個餵奶cycle去畀BB瞓覺，要睇住BB嘅清醒時間至得㗎！

清醒時間嘅意思，係指BB瞓醒開眼，到合埋眼瞓返之間嘅時間。

初生BB嘅清醒時間，一般只有45-60分鐘，所以其實喺餵奶掃風換片之後，已經夠鐘要再瞓過。

由於初生BB能支撐嘅清醒時間好短，所以有時攰得滯就會喺餵奶時合埋咗眼，食完就醒咗。

喺咁嘅情況下，BB就算只係合埋眼幾分鐘，但已足夠令睡意消失，於是令人有錯覺覺得BB好似好耐都唔駛瞓咁，甚至夜晚似乎瞓得好好唔會點起身食奶（其實可能係攰到暈咗 ）

但其實，BB咁樣會慢慢積落睡眠債，到4個月睡眠倒退期（其實係BB大腦發展成熟咗嘅跡象），就會開始出現頻繁夜醒嘅情況，甚至要食返夜奶

所以，照顧初生BB嘅其中一個重點，係要喺BB攰之前就已經要放床，千祈唔好等到BB捽眼打喊露，甚至開始投訴至帶佢入房瞓。

而要培養良好習慣嘅，其實係大人。

學識點樣觀察BB，明白佢想表達嘅意思，瞭解佢嘅需要，再作出恰當及一致嘅回應。

呢個至係真正令BB得到安全感嘅方法！有機會再講RIE育兒法

P.S. 我有一份「新手父母求生指南」，仲有一個1小時嘅免費教學影片，仲有之前post過嘅新手媽媽FAQ，歡迎分享

再P.S. 我估應該係有人喺媽媽谷分享咗Dolce Sleepers，多謝你

查詢詳情及報名，歡迎PM Facebook專頁或瀏覽網站