點樣提高睡眠訓練嘅成功率？
好多人誤以為，睡眠訓練就係將BB放落床由得佢喊，結果頂唔到幾多日就放棄… 今集0-3歲寶寶podcast，我邀請咗欣欣媽媽，同大家分享，佢幫囡囡知秋戒抱睡嘅經歷。
“幫BB去瞓得更加好嘅時候呢，真係要諗清楚點解要咁樣做。同埋當你要作出改變，心裡面要先預演BB嘅情況，就唔會咁慌。”
Click下面左邊嘅三角形箭咀，即能收聽（17:11）
文字版本請繼續拉到下面 👇
文字版本
C：Hello 欣欣，好多謝你今日接受訪問呀。
Y：Hello Catherine。
C：可唔可以講一講佢細個嗰陣時，其實佢係點樣嘅情況，佢嘅睡眠問題對你同你屋企人又有啲乜嘢影響呢？
Y：其實我自己覺得好恐怖，因為始終知秋係我第一個BB，我之前真係唔知道BB瞓覺係點樣嘅一回事。
BB啱啱出世嘅時候，嗰陣時有一個Auntie幫手照顧知秋，佢就有抱睡，同埋會搖知秋瞓覺；變咗日頭佢幫我照顧知秋，夜晚我又唔識，我就跟返佢呢一套方法。所以嗰陣時知秋瞓覺，其實我都唔知點解，啱啱初生到可能兩三個月，佢每一晚都會喊醒，最初嘅時候可能係半夜喊成兩個鐘，我就覺得好崩潰。後尾佢有慢慢好啲，但係因為佢係抱開、搖開瞓覺，變咗其實每一次要令到佢瞓覺都要好長時間，可能要成個鐘、或者個幾鐘，所以其實嗰段時間對於我嚟講都幾辛苦。
C：咁你曾經試過做啲乜嘢去改善呢個情況，喺認識dolce sleepers之前？
Y：都有㗎，因為我一直都聽過，原來有啲BB係天使寶寶，原來擺落床就即刻瞓㗎喎。咁我最初就亂咁試，我記得我啱啱喺加拿大返香港，仲係隔離緊嗰段時間，我哋喺住嘅地方其實對知秋都係一個新嘅環境，我第一晚就將佢就咁擺落床，佢就喊得好犀利。但係我就諗住我唔理佢佢就會瞓著，其實最尾佢係嘅，好似喊咗九個字。跟住我諗住我成功喎，我第二次都係咁做，佢的確係喊短咗時間瞓著，好似半個鐘。但係去到第三次嘅時候，佢就喊超過一個鐘。我就覺得好似唔work，而且我都好辛苦，因為我老公都喺我身邊，我又唔知道自己做緊嘅嘢啱唔啱，於是我又變返抱佢。所以其實嗰次係唔成功。
C：呢個都係好常見嘅情況，好多時候啲媽咪都會話：試咗兩日好work喎，但係突然有個情況出現，個BB喊得勁咗，跟住又抱返。呢個都係我成日都聽到嘅情況。
咁你後來有冇realize到究竟係乜嘢導致呢個情況，點樣可以避免呢個情況再出現呢？
Y：因為我其實係唔知點樣做㗎嘛，我之後就抱返。但係好似過咗一排之後，我就有個朋友、中學同學講咗畀我聽有呢一個dolce sleepers嘅網頁。咁我就開始睇，刨咗好多文章，終於發現原來之前自己做嘅嘢全部都係唔應該嘅，或者唔係最理想嘅做法。於是我又再根據你文章入面講嘅一啲建議再去調整。後尾佢係成功咗嘅，但係擺佢落床呢個做法、呢個過程都需要幾個禮拜；佢最尾就真係可以自己瞓到。
C：成個過程之中，你覺得你自己個諗法有啲乜嘢改變？有啲乜嘢幫到你佢渡過呢個時期呢？
Y：其實因為嗰陣時睇咗你好多文章嘅資料，講到關於乜嘢為之好嘅清醒時間，同埋應該點樣去面對，當中有提過我哋嘅做法要保持一致，但係我因為唔係好識，我嗰時又未去親身問你呢個問題。變咗其實我最初採取方法係循序漸進，即係我唔係一開始就擺佢落床、扔低佢咁嘅，我就可能由最初要抱變咗擺喺床度拍，總之就慢慢去減少自己嗰個接觸咁樣。
咁但係我一直就提住自己，因為你啲文章好多時都提到呢個過程唔係一條直路，係會有起有跌。但我就提醒自己，如果我去咗下一步，例如我由拍變咗做就咁望住佢，或者就咁喺佢床邊，我就唔好再返轉頭，即係我就唔好因為佢喊走佢拍返佢，或者去抱返佢搖返佢。變咗我係明顯見到可能開初嘅時候喊得好犀利，可能頭一兩日真係好唔知道媽媽點解突然間唔抱；但係去到慢慢，佢係越嚟越喊得少，同埋去到最尾、去到成功嗰日，我好記得有一日呢我係唔需要拍佢，我又喺床邊、唔需要掂佢，突然間見到佢自己瞓著咗，嗰一吓我真係覺得好感動，我覺得原來係真係會成功。我就真係覺得好開心，同埋覺得唔好認為BB一定需要我先至可以令到佢瞓著。我嗰一吓亦都好感謝我可以知道你呢一個網頁，因為真係學到好多嘢，同埋你講嗰啲嘢好實在，我哋真係可以應用到出嚟。
C：你頭先講亦都係好好嘅一點，就係好多媽咪其實想BB唔使再抱睡、唔使再奶睡，只會諗到睡眠訓練，就係放低BB、由佢喊好耐；但其實有其他做法都可以慢慢畀到個support佢，呢個亦都係我嘅網上課程「睡眠調整全面睇 」入面會有提到兩個方法，就係點樣可以用一個漸退式嘅方法，慢慢視乎BB情況，再決定下一步點去做，唔需要一下就有一個好大嘅轉變。咁當然呢個都好視乎個個BB嗰個情況、媽咪育兒觀嘅睇法等等，去決定究竟真係做睡眠訓練，抑或係用另一個方法慢慢去逐步去減低媽咪爹哋佢哋幫BB瞓覺嗰個干預度。
喺成個過程之中，我想問吓你個心態上其實係點樣呢？有冇啲乜嘢改變呢？
Y：其實由最初雖然睇咗你嘅資料，但係始終要自己去實行嘅時候，你都係會十五十六，同埋BB真係會喊。
其實最初嘅時候，每一次佢喊我就掙扎：我係咪要抱返佢呢？但係我就不停提醒自己，如果我每一次都咁樣行返轉頭嘅話，我就冇辦法睇到到底BB係咪真係可以做到呢樣嘢。
所以其實我都由好唔信任，但見到BB不停都有進步，好似真係向前行緊嘅時候，就令到我真係有咗一啲信心，無論係對自己做緊嘅嘢，或者係對BB嘅能力。
去到後尾，BB真係能夠成功自己瞓到，我自己就覺得：原來有啲嘢真係需要放手，同埋要相信知秋係做到嘅，所以我覺得對雙方都係一個肯定。
C：係呀，明白呀，講緊嗰樣嘢就係，講出咗好多媽咪嘅心態，就係個決心嗰個位。
個個媽咪都想BB可以放落床、Goodnight，佢就自己瞓覺、一覺瞓到天光，個個ultimately都係想有呢個目標。但係你知道要達到呢個目標係有個轉變、改變要去做，你需要有個決心去做呢個改變先得嘅。好多時候一個咁大嘅轉變，可能習慣奶睡、抱睡，你要放佢落床睇住佢喊，係好有疑慮嘅，一定會係(Y：好痛苦)，會懷疑自己做緊呢樣嘢究竟啱定唔啱呢。
當然好多時候我都會建議媽咪唔好諗到咁遠住先，你一定要先定咗一個小嘅目標、一個初期目標，等你可以有一個階段性勝利。初期目標有啲咩呢，例如調整返個時間表先，你而家明知個BB成十一二點先瞓係太夜，你都知道佢係攰㗎喇，咁一個短期目標可以係調整返個時間表先，你調整返啱個時間表，你發現：咦，佢已經容易咗瞓著，已經快咗，可能十幾分鐘已經瞓到，跟住夜晚醒，可能平時個零兩個鐘醒一次，而家可能夜晚只係醒兩三次，已經有個階段性勝利。
跟住你見到好似頭先你所講真係有進展，我而家可以做咗呢一件事，咦有個進展喎，我哋繼續再去做；當然好多時候你有進展可能抖一抖先，睇吓你下一步有幾大啦，當然你下一步越大嘅時候你個決心係越大，你需要做嘅準備，包括實際上喺睡眠上嘅準備同埋心理準備，大人嘅心理要準備好，BB嘅心理其實都要準備好。呢個亦都係RIE育兒法好多時候我好強調嘅一點，就係無論我哋做任何一個動作，其實我哋都會想同BB講一講先，尤其是你去做改變更加係，你會想同佢講：「我即將會係點樣，而家會係點樣」，或者大個啲嘅時候可能用一個roleplay嘅方法，畀小朋友見到實際上嗰件事係會點樣發生，等佢有個心理準備。
好重要嗰樣嘢係，冇準備冇計畫而去話：「好啦，試吓啦，試吓睇吓得唔得先啦」，通常都係會失敗嘅。好多時候我同啲媽咪傾嘅時候，佢哋話我想做睡眠訓練，我會同佢講：你係咪真係決心去做，而家有好多改變要去做，你要commit到；千祈唔好諗住試吓囉、睇吓得唔得囉，有呢個心態嘅時候我會建議你寧願唔好做。因為你試吓囉，跟住第一晚真係瞓到喇，yeah！跟住好多時候嗰個經驗就好似你初頭個經歷，就係好多其他嘢可能未做，去試吓放落床瞓得唔得；當然呢個係好多時候未認識到好多有關健康睡眠嗰樣嘢，好多時候對睡眠嘅誤解係好常見嘅。變咗嗰樣嘢就係：「試吓囉，唔得呀，咁算啦，返轉頭啦」咁樣，好多時候會係有咁嘅心態。當然亦都有個心態可能純粹係唔忍心，見到BB喊得好慘，就好想抱返佢，呢個亦都係好常見嘅情況。但係兩個情況都係冇一個破釜沉舟嘅決心。
例如好似有啲媽咪話要戒奶嘴。奶嘴唔一定要戒嘅，有陣時如果BB大個啲去到七八個月嘅時候，其實你可以教佢自己執奶嘴，係OK嘅；但係你要教佢執奶嘴，你都要有個改變，你唔可以再塞落佢個嘴度。或者有啲媽咪話：「我都係唔想做呢件事，我要戒喇」，我就會話：「你決定戒呀？好啦，咁你要揼晒屋企所有奶嘴佢，咁你先可以幫佢戒到」。其實破釜沉舟嘅決心係要去到嗰個位，你要揼晒所有奶嘴佢，你冇奶嘴，咁你就一定冇得再塞落去。
做睡眠訓練都係要有同一個咁樣嘅決心，先至可以令到BB嘅眼淚水唔會白流，你亦都唔會覺得：「我試過喇，做過喇，唉，唔work呀，算啦，都係繼續啦，大個就會好㗎喇」，真係好多時候都係呢個心態。
所以好多時候嗰樣嘢就係，唔需要等到去戒抱睡、戒奶睡，其實嗰個係成幅砌圖嘅最後一塊，當然之前有好多調整都要先做好咗先，做好咗先咁你先可以減低掙扎、增加成功率等等。
對於其他受睡眠問題困擾嘅媽咪，你仲有啲乜嘢想同佢哋講呢？
Y：我覺得首先媽咪真係要知道BB嘅睡眠問題，其實唔係得你一個面對，喺呢個世界入面其實好多媽媽都面對緊同樣嘅問題。所以首先第一樣嘢我覺得，大家唔好覺得係自己一個去面對呢個問題，其實係好多人同你一齊行呢條路，同埋你有需要嘅時候，其實真係可以提出嚟，好多人係願意去解答，或者陪你一齊行呢條路。
另一樣嘢就係，當我哋決定要去幫BB瞓得更加好嘅時候，我哋真係要諗清楚自己點解要咁樣做；同埋你每作出一個改變嘅時候，其實好似你個腦入面要去預演一樣。譬如你要諗清楚，可能你咁樣做嘅時候，BB可能會有啲咁樣嘅情況喎。咁其實你個心入面有準備嘅時候，當你見到BB有某啲情況出現嘅時候，你就唔會咁慌。
同埋有一樣嘢好重要就係，你唔好話今日咁樣做，跟住聽日就變返好似之前嘅做法，你真係需要去保持一致，咁樣BB先至知道媽媽呢一個改變係唔會返轉頭，咁佢先至唔需要再去測試你。即係唔需要：「可能我喊兩喊，媽媽就會嚟抱返我㗎喇，或者就會畀返奶我㗎喇」。如果你能夠保持一致嘅時候，其實你係對緊BB仁慈，因為佢唔需要再測試你，二嚟佢亦都唔需要去白流佢啲眼淚。因為你知道如果你好似之前咁樣做返嘅時候，咁當你下次想再去改變嘅時候，其實BB可能個反抗會更加大。
C：係呀係呀，你講得好好嗰一點就係，我哋要畀到BB一個好清晰嘅訊息，尤其小朋友大個啲，歲幾、兩歲幾嗰啲，我哋更加需要畀佢一個好清晰嘅訊息，先能夠畀佢安心。令到佢安心就係好似你所講，唔需要再測試，試吓：「如果我咁樣嘅話，媽咪又會點樣回應呢？係咪就會得到呢？」
測試行為係正常嘅，所以我哋越能夠保持冷靜去設限(boundary setting)，唔好覺得設限一定係好惡咁樣，板起塊面話唔得；唔係嘅，我哋好冷靜、好簡單咁同佢講：「OK，我哋而家係要點樣點樣點樣，或者我知道你想咁樣咁樣，咁但係我哋而家唔會咁咁咁」。又係去返我哋心態上嗰樣嘢。
另外有一點我都好開心你提出咗，就係喺育兒路上我哋唔係淨係得自己一個，有好多其他媽咪爹哋其實都好願意一齊去分享。呢個亦都係點解我而家繼續keep住facebook嗰度有個群組「dolce sleepers嬰幼兒睡眠討論區」，好歡迎咁多位媽咪爹哋加入呢個群組，大家一齊討論吓你仔仔囡囡嘅睡眠問題，傾吓咁樣。
今日好多謝欣欣媽媽接受我呢個訪問，同我哋分享點樣處理你囡囡嘅睡眠問題嗰個經驗、心得，好多謝你，有機會我約你再傾多集啦，拜拜！
