3個小轉變，同BB建立更親密關係

追開Dolce Sleepers嘅媽咪爹哋都知道，除咗健康睡眠，我更hard sell RIE育兒法

呢套育兒法嘅基礎，係視BB為完整嘅個體，有佢嘅思想、感情、喜好等。

所以，BB亦應該獲得尊重（例如抱起BB前會先同佢講，唔會從後一下就抱起）

係呀！雖然初生BB未識講嘢，但我哋都會照同佢哋講嘢，同BB溝通，亦會畀時間佢去回應（RIE稱為tarry time，第日有機會再同大家深入啲講解 ）。

BB其實係能夠從我哋嘅語氣、表情，同身體語言得，明白到我哋嘅用意。

當你每次做同一個動作時，都會講同一句說話，久而久之BB就會明白呢句說話嘅意思，儲入佢嘅超級大腦。

有一日，當BB能夠發出呢啲聲音，就會講出嚟嚇你一跳

所以，同BB講多啲嘢，特別係配合埋動作、有意義嘅說話，對BB嘅言語發展係非常有好處㗎！

講返琴日誤出咗嗰篇英文文章，內容係一位喺NICU照顧BB嘅護士嘅分享。

當佢用RIE育兒法去同BB溝通，佢發現自己更容易保持冷靜，同時間BB嘅情緒亦都更加平靜！

而且，BB嘅專注力亦都長好多，安於自己 #獨玩，唔會成日大喊要人抱或回應。

而呢位護士以前照顧過嘅BB，當佢哋長大後，見返呢位護士都顯得特別親切

到底呢位護士用咗乜嘢RIE魔法呢？

1) 同BB預告即將會發生嘅事，包括會令BB覺得唔舒服嘅檢查，都唔會因為怕佢反抗，而偷偷地快手做咗佢就算

2) 喺餵奶或換片等caregiving活動嘅時候，會全心全意注視住BB，唔會同時做其他嘢

3) 畀BB自己作主導，選擇想點樣玩，同埋幾時及點樣同大人互動

"Healing Babies With Respect – 3 Small Changes That Foster Confidence And Trust" 呢篇文，我save低咗好耐，諗住簡單翻譯成中文，再同大家分享

☆☆☆

嬰幼兒睡眠顧問 Catherine

#全港首位本地嬰幼兒睡眠顧問 ‧ #RIE育兒法專業課程畢業生 ‧ #孖仔媽媽

網上課程 / 電話諮詢 / 免費資源分享