活力爆棚但專注力低，一上車就瞓著覺？要注意啦！
你對於瞓得好嘅定義，係點樣嘅呢？能夠瞓過夜？唔駛次次氹成個鐘至瞓到？
我諗呢兩點都係絕大部份媽咪爹哋嘅夢想… 但咁樣係咪就等於瞓得健康呢？
其實，健康睡眠並非單單指能一覺瞓到天光，因為如果你囝囝囡囡夜晚只瞓到8-9小時，其實並唔足夠。加上如果日頭亦瞓得少，日夜睡眠長度加起嚟，未能符合BB每日所需要嘅睡眠總時數*，同樣係睡眠不足。
尤其是，如果你BB：
成日打喊露
易喊扭抱
你離開一分鐘都唔得
經常一上車就瞓著...
呢幾點都係長期睡眠不足嘅跡象嚟㗎！
就算你小朋友好精靈好精神，成日跳跳紮，亦唔代表佢唔駛瞓咁多。因為長期睡眠不足，會令大腦積累皮質醇呢種壓力荷爾蒙，令你小朋友成日處於精神亢奮嘅狀態。
有研究指出，小朋友成日走嚟走去冇時停，專注力不足，好似有過度活躍症嘅跡象咁，好可能係因為長期睡眠不足所致。當小朋友嘅睡眠質素得到改善，唔單止減輕咗ADHD嘅症狀，而且情緒亦會好好多，學習能力及記憶力亦會上升。
除此之外，當小朋友嘅夜間睡眠能夠配合到生理時鐘，睡眠修護效果會好好多，對BB嘅身體發育，以及免疫能力都有好大幫助。
咁到底點樣做，至能夠令BB瞓得足夠，瞓得好呢？
我嘅第一個建議，係唔好相信 — 「狠心」做睡眠訓練，令BB喊到識得自行入睡，就可以一勞永逸。
我唔係反對做睡眠訓練，相反其實我好鼓勵大家盡早正視BB嘅睡眠問題，而抱睡奶睡係夜醒嘅主要原因之一。但要改變BB一直以嚟嘅習慣，唔係由得佢喊幾晚就得，而且亦唔一定要佢爆喊唔可以理佢。
我相信，只要細心觀察及聆聽你BB，瞭解佢嘅真正需要，再調整我哋自己嘅做法及心態，就能夠幫BB再次擁有自行入睡呢種天生嘅能力。
睡眠訓練，可以是一件充滿愛的事
睡眠訓練，其實唔係訓練BB，而係訓練大人。
如果你同意我嘅諗法，但唔知點樣入手嘅話，可以PM專頁同我聯絡。
想知道更多有關睡眠訓練嘅資料，可以去呢個連結，免費下載小冊子。
