做睡眠訓練之前，有乜嘢準備呢？
想BB瞓得好，好多人都會即刻諗到做睡眠訓練。之不過，做睡眠訓練之前，有乜嘢要先準備好呢，點樣做至能夠減少掙扎呢！今集0-3歲寶寶podcast，我邀請咗Maggie媽媽，同大家分享，佢同囡囡幸言做睡眠訓練嘅經歷同心得。
“睡眠訓練對我嚟講，時間表，timing，心理準備都好重要… 我同小朋友都要準備好至可以開始。”
Click下面左邊嘅三角形箭咀，即能收聽（20:24）
文字版本請繼續拉到下面 👇
文字版本
Ep 2 - 做睡眠訓練之前，有乜嘢要準備呢？
C：Hello Maggie，好多謝你今日接受訪問，亦都好多謝你一直以來喺群組嗰度回答咗好多媽咪爹地嘅問題。
M：唔使客氣呀Catherine，其實我自己對嬰幼兒睡眠呢一方面都好有興趣，始終我都同自己嘅小朋友經歷過由一出世去到十個月大，都唔夠瞓，佢基本上每晚都紮醒好多次，然後我每一晚咁多次都要起身、埋身去安撫佢先瞓得返。所以我都好明白爸爸媽媽唔夠瞓係可以好崩潰、好沮喪，都想及早去畀多啲advice或者意見，都好想幫佢哋。
C：好多謝你。問返你少少background，你其實對最初係點樣認識dolce sleepers嘅呢？
M：其實最初真係就咁上網，因為嗰陣時湊小朋友真係好辛苦、好攰，尤其是佢瞓覺瞓得好差，所以上網瀏覽有冇一啲關於嬰幼兒睡眠嘅方法，喺Facebook亦都會搜尋唔同嘅資料；好好彩咁彈咗dolce sleepers呢個page出嚟，我就開始刨你嘅文。
C：睇吓睇吓就發現睡眠唔係咁簡單嘅事，真係有好多資料要知道，同埋可能越早知道越好。
M：係呀，絕對唔簡單㗎，因為其實啱啱做爸爸媽媽，第一，都冇諗過原來瞓覺對自己咁重要，第二，都冇諗過瞓覺對小朋友更加重要，尤其是而家先知，原來初生小朋友至少要瞓十四到十七個鐘或者更多，就更加覺得瞓覺好緊要。
所以就去研究或者去讀多啲Catherine你寫嘅文章，我最鍾意係你喺個網站入面有一個page，有好多唔同嘅blog嘅文，一有相關嘅問題我都會去刨文。
C：係呀，甜睡寶寶網誌。因為我會發現專頁嗰度其實儲埋咗好多篇文，都好唔方便，所以就不如開個blog啦，亦都有個search box，大家可以喺嗰度輸入你嘅問題嘅keyword，咁樣就可以搵返相關文章，方便大家可以睇返。
當然網誌變咗一篇篇文章比較散，所以本身我另外都有個睡眠課程，你都join咗呢個課程嘅，之後亦都做咗睡眠訓練。但係嗰時你冇搵我做睡眠訓練，我知道你係好好學嘅媽咪，做好咗基本嘅調整，因為嗰時我嘅課程開始做嘅時候，其實我唔係針對睡眠訓練去做，我係講緊睡眠調整，講緊點樣可以喺其他，例如時間表、環境，或者我哋自己嘅心態呀等等上面，點樣能夠幫到BB瞓得好，個重點喺嗰度。所以你join嗰陣時就未特別有睡眠訓練；而家就加咗個睡眠訓練，補充返呢方面嘅資料。我知好多媽咪爹地都好想知道多啲，但係嗰陣未有，所以你就自己睇好多書同資料去做。你可唔可以同大家分享吓嗰個經歷呢？
M：可以呀，其實基本上我覺得Catherine你做嘅嗰個course好有用，因為起碼真係畀我有一個好穩健嘅foundation，大概知道其實呢個月齡嘅小朋友要瞓幾多個鐘，佢會有啲乜嘢睡眠倒退嘅反應、表現，起碼我喺你嘅課程會知道最basic一定要知嘅資訊，我亦都相信你比我哋嘅資訊係正確嘅。
另外我覺得Catherine你課程裏面非常緊要嘅一樣嘢係心態嘅調整。呢個我覺得其實even我自己係有讀唔同嘅書去認識嬰幼兒睡眠，想幫我自己小朋友瞓得好啲，但我覺得你個課程講有關於兒童心理又好，大人心理都好，我覺得呢樣嘢好值得去highlight出嚟，亦都真係幫助咗我好多。
尤其是我之後都有幫自己囡囡做睡眠訓練，呢個係我自己嘅選擇嚟嘅，因為我同我先生都覺得小朋友嘅入睡方法要依靠好多唔好嘅習慣先至瞓到，所以我哋就覺得最後一步係要做睡眠訓練。但當然做睡眠訓練亦都有機會，或者唔做睡眠訓練小朋友都會喊；會喊嘅底下，我自己喺你個課程真係學識咗要去聽小朋友嘅喊聲，要明白其實小朋友喊係一種發洩嘅權利嚟嘅。呢個心態其實都幫助咗我好多，之後即使自己去做睡眠訓練嘅時候，都係一個好好嘅根基，畀我去堅持落去。
所以之後我就再做睡眠訓練嘅時候，我覺得最緊要係我最熟悉我個小朋友，所以我想customize一個適合我小朋友個脾性、習慣、月齡、佢對媽媽嘅嗰個connection，呢啲我都會係customize落去自己畀小朋友嘅睡眠訓練裡面。所以Catherine你嘅睡眠課程非常有用，亦都幫助到我之後想自己做睡眠訓練或者睇書嘅時候融會貫通咗好多。
C：你講得好好，其實我整呢個課程出嚟，最終目的都好希望令到爸爸媽媽你哋可以成為自己仔仔囡囡嘅睡眠專家。
因為你講得好啱，你哋自己仔仔囡囡你係最清楚嘅，你係親身第一手睇到嗰個情況點樣處理。好多時候如果你見到呢個情況，你會去諗點樣去處理，好過發生呢個情況去問一個第三者，其實可能真係冇一個咁切身嘅建議可以畀到，可能佢需要問好多資料。始終冇辦法每一日BB喊、唔同嘅情況，每一日都要去搵人問嘅時候，嗰個情況就複雜咗。
所以我真係好鼓勵大家都可以睇返多啲睡眠嘅資料，當然個課程係講得最基本，因為我將所有嘢濃縮成為一個兩個鐘頭左右嘅課程，以一個最深入淺出嘅方法去講最基本嗰啲情況。
但係你講得好好，尤其是係做睡眠訓練嘅話，其實都真係要睇返小朋友嘅情況，包括月齡、性格、媽咪爹地嘅育兒觀，甚至睡眠環境安排，其實都可能會有影響；即係可能你陪睡坐喺邊度，當我去做一對一諮詢嘅時候我都會問媽咪，可唔可以影你間房畀我睇吓？我會建議有啲乜嘢可能要執一執，或者坐喺邊度。
Customize一件事真係好重要，唔係話你聽到有一個咁樣嘅方法，照跟住去做啦，咁就work，唔係嘅。真係有事前準備要做，跟住你真係要諗：OK我決定做睡眠訓練，成個plan應該點做？如果發生呢件事，我應該點樣處理呢？如果發生呢個情況，我應該點回應呢？呢一個真係好重要，要預先諗定。
所以我自己作為睡眠顧問，我會覺得我係一個引導嘅角色，我會引導個媽咪去諗：如果呢個情況嘅時候，你點樣處理呢？Instead of「咁嘅情況，佢喊，我應該等幾多分鐘先抱佢呀？」我答唔到你呢個問題，因為頭先你都講，RIE育兒法我哋好著重睇BB佢點解喊、喊成點等等嗰啲情況去做判斷，唔係用一個數字、幾多分鐘去做準則；當然係會比較複雜嘅。所以呢個位都需要爹地媽咪用心去研究，好似Maggie你咁用心自己去睇書、研究，諗一個計劃畀你囡囡。
可唔可以再深入少少講一講個準備，除咗個心態上面，你仲有啲乜嘢心得可以同大家分享？
M：我覺得最緊要其實好多書本、文章，或者Catherine你嘅課程，其實我覺得第一，時間表你一定要調整得好啲；同埋可能都要睇我自己buy乜嘢。我好buy小朋友早瞓，我個女其實一直都係好早就瞓，六點幾七點佢就會瞓，只不過佢係夜晚夜醒。因為我自己知道小朋友早瞓有好多好處，成長、發育、成長激素，各樣呢啲都有關係。
所以我就會list第一我要secure佢個時間表先，我要知道佢日頭有冇充足嘅午覺，佢每日成日個清醒時間有幾多；起碼佢個時間表唔會好亂，唔知道下一節覺係幾點起身，或者下一節覺幾多點瞓，起碼我有一個好規律嘅時間表、好規律嘅作息，尤其是小朋友知道：原來我起身就要食早餐，然後會玩，跟住食午餐，跟住會點。即係畀小朋友亦都有心理準備，知道每一次我做完呢樣嘢，下步就係做啲乜嘢，起碼佢有一個心理準備，作息穩定嘅時候，夜晚開始去做呢個睡眠訓練就會比較順利。所以第一係個時間表。
第二，我會揀一個佢ready嘅時候去做睡眠訓練。因為如果小朋友唔舒服，或者小朋友出緊牙，或者佢啱啱打完針，或者可能嚟緊我會出去旅行，呢啲都唔係適合做睡眠訓練嘅時機。當然我亦都係因為睇書，會知道有乜嘢時間係唔適合開始做睡眠訓練，咁我就真係揀有直頭一個月時間，我會專心就係做睡眠訓練，其他大嘅事情我會擱置咗先。
我覺得睡眠訓練亦都要好認真去對待，不能夠話：我而家有決心做三日，之後如果佢有其他事情發生，我就放棄啦。我覺得呢樣嘢係浪費咗小朋友嘅心理準備，有機會浪費咗小朋友嘅眼淚，或者對小朋友嚟講亦都係一個唔consistent嘅做法。
所以睡眠訓練其實對我自己嚟講，時間表，個timing好重要，同埋個心理嘅preparation，我同埋小朋友係需要做好先可以開始。
C：你講得好好。提返頭先Maggie有提到，有啲咩時候係唔適合做睡眠訓練，喺頭先提到嘅blog甜睡寶寶網誌dolcesleepers.com有一篇文章有講，有邊幾個情況唔適合做睡眠訓練，大家都可以去睇返。
Maggie你可唔可以再詳細講一講，當你去做睡眠訓練嗰幾日、嗰個星期嚟講，嗰個情況其實係點樣？可以同大家分享一下嗎？
M：其實個情況都可以真係睇返我個女嘅反應。第一我有老公支持，所以真係到開始嗰晚實行瞓覺，我都有心理準備佢有機會會喊。的確佢開頭都喊咗可能三四十分鐘，但係呢段時間裏面我一直喺房裏面陪住佢。
我個心理調整咗，就覺得小朋友喊嘅時候佢亦都係喺度表達緊佢嘅唔適應。都明白嘅，好似我哋如果突然間大人瞓覺冇咗個枕頭，我哋都會瞓得唔好，亦都可能會瞓唔到。
所以佢第一晚、第二晚、第三晚都好，佢亦都會有用喊聲表達，但係我自己嘅做法就係，我會一直喺佢身邊陪住佢。因為我個女個脾性係非常黐身，亦都唔係好easy going嗰啲小朋友，我又唔想標簽佢為sensitive嘅小朋友，但佢係比較strong-willed，比較有諗法。
所以我記得嗰陣時同佢做睡眠訓練嘅時候，已經係十個月大，佢識得翻身，又識得擒喺度、企起身。所以我嘅做法都真係畀一個清晰嘅訊息話畀佢知：要瞓覺喇，熄咗燈，開咗白噪音，你都著咗睡袋，就喺佢側邊陪住佢打氣，然後我自己睇書就學咗椅子法，所以就慢慢咁樣做，可能開頭係可以用身體接觸去安撫佢，跟住之後就用聲音去安撫佢，然後去到後面，椅子法係教你將張凳移遠少少，但我發覺我嘅存在令佢更加激動，所以我去到後期，可能第五、第六、第七日，我就直頭已經係放低佢，畀咗一個清晰嘅訊息佢知道佢要瞓覺。
因為佢頭五日已經practice咗熄燈就係要瞓覺，佢係知道嘅，我作為媽媽亦都知道佢明白嘅，喺呢個前提底下，第六定第七日我就直頭放低佢，然後喺出面房嗰度睇住個BB cam，咁反而我就見佢settle得快啲，好快就冇喊。
所以其實我覺得喺睡眠方法上面亦都唔能夠淨係用一種，有時小朋友佢喺睡眠訓練嘅過程當中，都有機會係會用到一種、兩種或者三種嘅睡眠訓練嘅方式，但係一定要喺啱嘅時機，同埋你要好熟悉你嘅小朋友嘅脾性同反應，你先可以去轉個方法。
C：你講得好好，呢個係好重要嘅一點，點解我嘅網上課程冇真係教你點樣做睡眠訓練，而家雖然有一個zoom class，但係嗰度其實都係講基本有啲乜嘢睡眠訓練嘅方式。
但我本身個睇法就係，每一個小朋友嗰個情況，我哋真係要視乎返佢當時嗰個回應方式同反應，我哋再去諗點樣去回應。
我曾經有個case都係咁樣，我同個媽咪當日傾完電話，我同佢講，你不如試吓坐喺隔離陪佢瞓啦，佢就坐咗一陣間，大概幾分鐘，咁個BB喊得好犀利。
跟住佢突然間需要出一出去去toilet，佢出咗去，當然佢都有同BB講咗，之後佢發現個BB靜晒。跟住佢望吓個cam，個BB已經自己瞓咗。真係試過有咁嘅case，嗰個case我連報告都未出畀佢，佢嗰晚已經好心急諗住試吓去做，跟住就發生呢件事，從此就瞓得好好。
所以好多時候究竟陪唔陪住個BB，當然我哋嘅育兒觀係有影響，有啲媽咪覺得唔想留個BB喺房入面、等佢自己一個，你陪佢係OK嘅，但係都要睇返你陪住佢究竟係幫到BB？定係騷擾到佢？
另一樣嘢都要諗返，我哋陪住BB嘅時候，自己嘅情緒係點樣呢？我哋嘅情緒會唔會見到BB喊，我哋可能畀佢trigger到，覺得好擔心，跟住繼而可能同佢喊埋一份，情況就會更加惡劣，我哋唔能夠令到BB安心去瞓覺。
所以呢個又係去返個心態，我哋點樣睇睡眠，點樣睇哭泣？心態上面可以幫到好多。
M：我想分享多一樣嘢，我自己睇書學到兩樣嘢，我都覺得好緊要。
第一就係小朋友真係可以感受到爸爸媽媽嘅情緒，所以如果例如你越心急想佢瞓，佢就越唔畀你瞓，或者你越心急、越緊張驚佢瞓唔到，其實小朋友自己都會越緊張。所以大人個心態同情緒安穩啲，其實真係可以安撫到小朋友。
另外就係如果真係老公都support小朋友瞓得好同做睡眠訓練，呢個亦都係非常之好。因為有時候媽媽入去可能小朋友會激動、唔肯瞓，但係爸爸入去，小朋友會更加激動但係好快就冇事、就即刻瞓，因為佢發覺「咦，爸爸嚟嘅，都係瞓覺啦，冇得嗲」。
所以呢兩樣嘢我覺得幾實踐到喺我屋企嗰度。
C：嗯，我聽過唔止一個case，媽咪氹瞓覺一定要奶睡，姐姐抱就得，爸爸由佢喺張床度就可以瞓到，唔止一個BB係咁嘅情況。所以真係睇BB，同埋我哋能唔能夠去let go，去相信BB其實可以瞓到，呢個都係好重要嘅一點。
好多謝你接受今日嘅訪問！
