就嚟兩歲，仲可以做睡眠訓練嗎？
做睡眠訓練最好等到BB滿6個月，咁有冇年齡上限呢？已經歲幾兩歲嘅小朋友，仲可以做睡眠訓練，令佢自行入睡嗎？今集0-3歲寶寶podcast，我邀請咗Mitsaki媽媽同埋佢先生Vincent，同大家分享，佢哋幫囝囝 Quentin轉小童床，並且令佢能夠自行入睡嘅過程同心得。
“其實嗰陣時我都係質疑嘅，但我覺得首先要相信，如果我都唔撐我老婆嘅話，咁佢就冇乜寄託嘞！所以我一定要support佢。”
“之前我覺得，我係媽媽我要教佢，但接觸咗RIE育兒法之後，而家會尊重佢嘅意願，接受佢嘅選擇… 呢點令我條育兒路輕鬆咗，冇以前咁大負擔，唔再諗住要控制佢。”
Click下面左邊嘅三角形箭咀，即能收聽（18:35）
文字版本請繼續拉到下面 👇
文字版本
C：Hello Mitsaki，Hello Vincent，Quentin而家兩歲半，我知道佢而家每晚都喺自己張小童床嗰度瞓覺瞓得好開心，但佢細個嗰陣時並唔係一個甜睡寶寶。
可唔可以請你先講吓，佢細個嘅時候係瞓成點？你哋又曾經做過啲乜嘢調整，令佢瞓得好啲呢？
M：佢細細個嘅時候係一個「睡渣寶寶」，一晚醒十幾次，我覺得佢唔識瞓覺。
跟住之後我就認識咗Catherine你，睇返你嘅page去調整佢嘅作息。之後再搵埋你做埋個電話諮詢，而家就真係好好，佢可以自行入睡，自己入返間房瞓返覺，成個過程唔洗我哋點樣搞，好開心呀，我哋而家多咗好多me time。
C：呢個真係非常之好嘅結果。但係可唔可以同大家分享一下個過程，佢點樣由一個「睡渣寶寶」變成「甜睡寶寶」，一個好鍾意瞓覺嘅小朋友呢？
M：呢個過程比較漫長，我長話短說啦。之前其實佢就抱睡、奶睡，一定要用奶嘴瞓覺，但係奶咀嘅問題就係去到半夜嘅時候，佢醒幾次，你就要起身不停執奶嘴，不停執奶嘴。
後尾我join咗Catherine嗰個全面課程（睡眠調整全面睇），知道有睡眠關聯呢一樣嘢，亦都知道咗作息個清醒時間。我跟返清醒時間去調作息之後，跟住再叫我先生一齊幫手，因為我覺得自己係一個刺激佢嘅存在，所以我就叫我先生代替我去安撫佢瞓覺。呢一個過程好順利，佢好快就自己喺唔需要媽媽嘅情況之下，就叫爸爸陪睡瞓覺。
但後尾再隔多一段時間，我哋就開始做一個睡眠訓練，就係自行入睡，呢個就係Catherine嘅方法。差唔多兩三個禮拜左右，佢自己夠鐘就同我哋講good night，跟住就自己入房瞓覺喇。
C：我記得佢當時大概十九個月大，係咪？
M：嗰時我記得好似係十九、二十個月大，好似啱啱係睡眠倒退期咁上下。
C：歲半係分離焦慮嘅高峰期。因為好多媽咪成日會問我，我嘅仔仔囡囡已經歲幾兩歲喇，仲有冇得救呢？
所以呢個係一個好機會，希望你都可以同大家分享喺呢個月齡嘅小朋友嗰個情況係點樣改變。頭先你講過最大嘅改變係改為由爸爸負責做哄睡呢一個角色，係咪？
M：係，冇錯。同埋我覺得媽媽要堅持，因為其實頭先講18個月係分離焦慮嘅高峰期嚟，基本上BB見唔到媽媽就已經喊㗎啦。就算你用聲音去安撫佢都好，佢都會覺得「媽媽都唔喺度嘅」，佢見唔到媽媽就爆喊，就算畀十個奶嘴佢都一樣爆喊。所以嗰時我好頭痛，所以我就搵咗Catherine。
後尾同Catherine傾完之後，其實Catherine都提議過話不如試吓轉一個陪睡嘅人，叫爸爸試吓先，又再切斷個睡眠關聯。其實我嗰陣時都冇乜希望，但都試吓啦。
爸爸陪睡嘅時候入去，BB都喊咗一陣，大概十幾分鐘倒，爸爸都一路安撫、一路喺度講嘢；媽媽就堅持千祈唔好出聲，千祈唔好入房。
直到爸爸傾完一輪，BB突然間又OK咗；去到第二日佢又好主動去拉爸爸一齊瞓覺，就唔係拉媽媽，好得意嘅呢樣嘢，之後就已經OK喇。
C：Vincent你記唔記得嗰陣時個情況係點㗎？可唔可以同大家分享吓？
V：其實嗰陣時我都係質疑嘅，因為我本身都返工，其實我會覺得我老婆首先要相信先，如果我都唔撑我老婆嘅話，咁就冇乜寄託喇，一定要support佢。
首先我聽完關於睡眠嗰啲內容，我都覺得好質疑：「得唔得㗎？」同而家我聽我老婆佢嗰啲friend都係咁上下。但係我覺得我都要撐老婆，咁樣我都嘗試吓啦。
初頭我都覺得半信半疑，但係後尾聽我老婆講，我都盡力去做啦。
咁試多幾個禮拜之後，「咦，原來我個仔係真係瞓到覺㗎喎」，就覺得呢樣嘢好神奇。
C：會唔會覺得你同個仔嘅關係親密咗？
V：都會㗎。
C：而家拉住爸爸都得，媽咪你唞下先啦！咁大家都好開心。
M：而家係咁㗎，真係會㗎。因為嗰時Quentin大概七點半就要瞓覺，跟住我老公放工係大概七點幾，見得半個鐘。所以後尾Catherine就提議不如睡前儀式試吓由我先生去handle，佢哋見嘅時間多咗，第二日出嚟嘅效果，個仔就會知道：「爸爸都幾好玩喎」，就唔洗黐得我咁實，分離焦慮症又可以減少啲。
C：呢個好多時候我都好建議，尤其是爸爸遲放工，或者雙職父母都係，媽咪都會遲放工嘅時候，變咗冇乜時間可以同小朋友相處，就會覺得「仲要早瞓？」
所以我都好建議，RIE育兒法我哋都講緊，睡前儀式其實都係一個好親密嘅親子時間，幫BB換片、餵奶、換睡衣著睡袋等等，呢啲全部都係好好嘅親子活動，唔一定要玩遊戲、睇書、講故事先至係真係相處，呢啲其實都係好好嘅時間，都可以係增進到親子關係。
我其實都特別想請你講一講，因為而家Quentin兩歲半，一般嚟講，其實如果有睇開dolce sleepers專頁嘅媽咪爹哋都有可能遇到，我通常建議唔好咁早同小朋友轉小童床，盡量三歲先。但係Quentin嘅情況有啲特別，嗰時你搵我去傾嘅時候，我就話咁嘅情況唔得喇，要轉小童床。你可唔可以講返嗰時嘅情況係點樣呢？
M：因為Quentin實在係小泰山嚟，佢半夜都可以爬。我哋嘅BB床個圍欄都算高，但佢好輕易就可以爬出嚟，仲試過幾次跌出去、跌落地下。因為佢個人完全冇危機感，佢跌過幾次。
因為半夜其實佢真係瞓著咗，夢遊嘅狀態都可以照爬出去，佢好習慣，爬出去然後跌落地下，佢係有痛，但我更加心痛。
跟住就真係迫不得已，試吓用play mat，因為我哋嗰時未打算換小童床，就諗住不如試吓，Catherine都提議試吓瞓地下啦。因為我哋屋企比較細(C：係常見問題嚟)，總之真係唔係話可以瞓地下，其實地下好多雜物。唯有諗住試吓用play mat啦，play mat都叫做四邊圍住，都叫做瞓地下，咁佢點都碌唔到出去喇啩？但瞓咗一排我又會覺得，始終香港濕氣比較重，傳統啲講，我覺得BB好似唔係瞓得咁好，佢好醒瞓，冇瞓喺床咁熟睡。
卒之去到廿三、廿四個月左右，我終於同老公講，不如真係試吓轉小童床啦，起碼佢個高度矮過BB床，大概35cm，以前嘅BB床就大概差唔多70cm，係一半嘅高度。我就話起碼跌落嚟都有個譜呀，最多下面墊啲咕臣，佢碌落嚟都有個譜，起碼冇以前咁痛。
轉之前就不停同佢傾，就話「BB不如我哋試吓轉小童床好唔好？同BB床講拜拜，好唔好呀？」佢曾經有一段時間都「no no」我，話「唔好」、「唔鍾意」咁樣。
咁我就畀小童床啲相佢睇，話「不如你試吓啦，你已經大個仔㗎喇，你又高咗，BB床瞓得唔舒服㗎喎，不如試下小童床啦」咁樣；搞吓搞吓佢就突然之間同我講話要轉兒童床喇。
咁樣我哋好快速，兩三日已經買咗張兒童床返嚟，然後又好快速咁叫佢話：「你同BB床講拜拜啦，我哋即刻扔出街㗎喇。」佢又好OK喎，仲好開心咁講拜拜。
跟住爸爸喺度砌緊個兒童床嘅時候，佢又好開心咁一齊參與、一齊砌，幫手遞釘、幫手揼揼揼。跟住就自己揀床單鋪上去。
嗰日都未夠鐘瞓覺(我哋平時因為佢而家大個咗，八點鐘先瞓)，未夠八點，佢食完個晚餐就已經話佢要瞓覺，跟住就入咗去。
C：呢個就係參與嘅重要性，佢好有期待，砌完呢張床出嚟，好想瞓吓睇吓會點樣。
M：我知道佢之前其實比較鍾意BB床，因為其實佢真係好鍾意爬呢個動作。我都曾經諗過個BB床唔好咁快即刻掉住，擺埋一面先好唔好呢？
但係我又見佢好開心咁樣同BB床講拜拜，咁好啦，唔好阻住大家，快啲講拜拜。
佢當晚又瞓得OK，本身諗住新環境、新床，床褥都唔同咗，佢應該瞓得唔係咁好；點知原來又OK、冇乜分別喎，其實都係咁樣瞓㗎咋喎。
唔知係佢適應力強，定係之前嘅訓練有用，但結果就係OK。
C：我覺得好重要嘅一點就係，你真係等佢話佢ready、佢想轉，你先轉小童床。因為我哋都會建議，唔需要話等三歲轉小童床，咁樣三歲生日就買小童床畀佢啦，唔需要咁樣嘅。等小朋友佢提出：我想轉床，想瞓第二張床喇，先去轉，加上佢參與咗轉床成個活動、有更加大期待嘅時候(就會更好)。
當然你頭先話你之前有同佢做好多預告，等佢心理準備，呢個係我成日強調嗰樣嘢。我哋做任何改變嘅時候，都先同BB、小朋友講咗先，講多幾次，第一次佢聽到可能唔明實際上係點樣，佢就算明都可能未必接受，講多幾次等佢慢慢接受，再去做合作等等。所以我哋同佢講多幾次，等佢ready，呢個我覺得係做任何改變都好重要嘅一件事。
M：即係RIE所強調嘅尊重，BB係一個個體，我哋要尊重佢嘅意願；呢樣嘢對我育兒嘅方法係好大顛覆嘅。之前我都會覺得我係一個媽媽，我要教佢；但係接觸咗你同RIE嗰個育兒方法之後，(知道)要尊重佢嘅意願同埋接受佢嘅選擇，佢OK就OK，我唔會強迫佢。
我覺得呢樣嘢對我成個育兒之路嚟講，其實而家係輕鬆咗，冇以前咁大負擔，話：「我係個媽媽，我一定要你點點點；我控制唔到你，你又點點點」。而家我唔需要控制佢，我當佢係一個人、當個friend咁，你OK我咪OK，你唔OK咪唔OK囉。
V：呢個我都有少少改變，因為我阿爸都係一啲好古老嘅人，好老土講句，「我講咩都要聽㗎喇」嗰種，咁我好明顯之前都會copy咗呢個性格，但係而家聽完我老婆講Catherine教嘅方法之後，都覺得而家as a friend，真係好似西方嗰啲同個仔做朋友咁樣，同埋我覺得個關係close咗好多。
C：呢個其實真係RIE育兒法好強調嗰樣嘢：互相尊重，我哋尊重小朋友佢嘅意願，我哋都要求小朋友去尊重我哋嘅需要。當小朋友ready去做嘅時候，或者佢知道發生咩事，成件事真係會順利好多，我哋大家嘅關係會更加有信任喺度，呢一個係RIE育兒法好重要嘅一點。
但當然有啲情況之下，如果有啲位我哋需要設限，即係boundary setting嘅話，RIE育兒法都好強調呢一點，我哋尊重小朋友嘅情況，但係如果遇到一啲位，例如安全問題，例如出街有車嘅，當然我哋唔可以話佢唔想拖手就唔拖，一定要拖住。
呢個boundary setting喺RIE育兒法都好重要，所以兩樣嘢都要一齊去做。
所以大家如果對RIE育兒法有興趣，都有個Facebook群組，好歡迎大家加入，我都會分享一啲文章。
V：係呀，都好有用。
C：好多謝你哋分享你對於RIE育兒法呢方面嘅觀點。最後一條問題，對於其他受睡眠問題困擾嘅媽咪，你哋有冇啲乜嘢想同佢哋講呢？
M：要作出改變，一定要堅持。我覺得呢樣嘢好重要。
V：同埋我覺得係應該相信believe囉，唔好話「得唔得㗎」咁樣去質疑，其實我會覺得試咗先，唔好半途而廢，因為個結論其實係，自私啲講句，爸爸媽媽都想瞓得好㗎嘛，因為其實我哋都想個小朋友瞓得好嘅。都係嗰句，小朋友瞓得好，爸爸媽媽自然瞓得好。咁如果係基於自己嚟講嘅話，點解唔再試吓其他嘅方法呢？就唔好質疑佢得唔得，行動咗先、試咗先。
C：係呀，頭先講咗試，同埋要堅持起碼一段時間。好多時候我知道好多媽咪爹哋都會話：「好啦試吓啦」，但係可能試一兩日，或者不斷試唔同嘅方法但係都唔得。因為其實好多時候我哋去做一個改變，無論係咩改變，唔好話去改變小朋友，改佢嘅時間表、早啲瞓，或者可能夠戒抱睡奶睡入睡方式；就算我哋大人，我哋要改變我哋自己嘅習慣，要食多啲蔬菜、做多啲運動，我哋都要堅持係咪？其實原則係一樣。
所以大膽踏出一步，好似你所講「試吓先」，但係唔好諗住試一試就話「唔得喎，算啦，都係等佢大個啲先算啦」，呢個都係我開呢個podcast嘅原因，我好希望借咁多位媽咪爹哋嘅親身分享，可以令到多啲媽咪爹哋有信心知道呢一樣嘢真係可以work到，爭在你花幾多心機去做。因為我聽你哋講，你哋都花咗好多心機去諗，同佢做預告等等，之後知道方向正確就堅持去做，呢個真係好重要好重要嘅一點。
有機會第日再邀請你哋兩位再分享多啲RIE育兒法嘅嘢啦！今日好多謝你哋接受我呢個訪問，同大家分享。
