而家攪掂咗，就可以一勞永逸？
好多人以為，只要而家攪掂咗囝囝囡囡嘅睡眠問題，就可以一勞永逸。其實，隨住小朋友越嚟越大個，睡眠問題係會以唔同嘅形式出現！今集0-3歲寶寶podcast，我邀請咗Natalie媽媽，同大家分享，佢點樣一次又一次，做唔同嘅調整，成功處理佢兩個小朋友嘅睡眠問題。
“一定要喺你預定嘅時間之前，已經編排好同講好，如果唔係中間打斷咗個計劃，自己嘅心情就會好煩躁。”
Click下面左邊嘅三角形箭咀，即能收聽（19:50）
文字版本請繼續拉到下面 👇
文字版本
C：Hello Natalie，好多謝你今日接受呢個訪問呀。
其實你呢個case比較特別，因為你曾經搵過我做兩次「單次電話諮詢」。不如你講一講
最初嘅情況係點？做完一次諮詢之後係點樣嘅情況，點解又會搵我做第二次諮詢呢？
N：我最初做第一次諮詢嗰陣時，妹妹就係大約七個半月左右，姐姐就係大約一歲九個月左右。
嗰陣時妹妹比較難去入睡，佢唔似姐姐之前咁容易，一落床就會知道「要瞓覺喇」；妹妹需要抱，同埋要好長時間去氹，就算所有環境好安靜、好黑，佢都係完全唔可以，一定要陪住、抱住，情緒上都有少少難搞，所以我就搵Catherine做第一次諮詢。
做完之後其實大約一個星期，情況已經好明顯地改善咗，咁我就以為好開心啦，成件事成功咗啦，一勞永逸喇已經。
但係過咗幾個月，妹妹大約十一個月，然後我就覺得「唔得喎」，佢成日夜醒，個問題都好嚴重。夜醒仲搞到姐姐都會醒埋，夜晚嘅情況就比較難搞。然後我就需要再搵Catherine做第二次諮詢。
做完第二次諮詢之後，我發現原來其實喺佢隔離係需要同佢講一啲說話，同佢講：「知道你好攰喇」，同埋「知道要瞓覺喇」，就唔係純粹去氹佢咁樣。
第二次諮詢後嗰段時間就耐少少，可能大約兩三個星期左右，情況就已經好咗好多，成件事去到而家都好好，兩個都瞓得比較容易，同埋平靜啲，成件事唔會好似鬥爭、拉鋸咁樣。
C：係呀，當然視乎睡眠問題嘅成因，如果有時比較簡單，可能調整時間表或者環境嗰啲，你做好咗嗰樣嘢，就可能好快就明顯見到效果；但有陣時比較心理上嘅問題，尤其是小朋友大個啲嘅時候，佢哋個心理因素影響越來越大。變咗我哋要令佢安心瞓覺，真係會需要多啲時間先至可以改善得到。
你有冇印象你嗰兩次搵我諮詢，你做咗啲乜嘢調整，或者做咗啲乜嘢改變，令到睡眠可以得到改善呢？
N：其實第一次，我就嘗試去改一改個時間表，第一次改完個時間表，因為可能計算返佢nap 1同nap 2個差距，咁夜晚嗰覺就比較容易一覺瞓到第二朝。
第二次嘅時候主要其實都係一啲對話上，因為環境都已經係安靜同埋黑咁樣，畀佢適應瞓覺。主要都係同佢對話上嘅溝通，令到妹妹容易瞓啲。同埋第二次，姐姐咁啱突然間話好驚行雷，跟住夜醒咗超多次，都係同佢講返一啲對話上嘅嘢令到佢安心，唔係話「唔使驚㗎，行唔驚㗎，唔會驚㗎」，唔係呢啲，係同佢講「我都明白行雷好驚，但係行雷其實只不過係一啲雲碰撞咗然後出嚟」，即係令佢明白嘅嘢，唔係解釋天文現象；突然間嗰一晚，真係一晚，佢就好似忘記咗成件事咁樣。
C：係呀，好多時候小朋友睡眠如果係心理因素影響嘅時候，或者佢喊等等，我嘅建議都係用返RIE育兒法，頭先你講緊嗰樣嘢就係所謂一個acknowledgement，肯定小朋友嘅感受。因為第一樣嘢，如果佢喊「好驚好驚」，跟住你同佢講「唔洗驚」 (N：完全冇幫助)，真係冇幫助。
但係呢個係好正常嘅，喺我接觸RIE育兒法之前，我哋見到有人唔開心都會話「做咩唔開心呀？唔好咁啦，一齊去食蛋糕啦」，諗住用一個分散注意力嘅方式；但係其實唔係嘅，我哋真係需要一個同理心，真係去acknowledge，跟住有個同理心去肯定佢呢個感受，畀佢知道我哋真係明白佢呢個情況，佢明白、feel到我哋係明白佢嘅時候，佢可能就已經安心咗好多，就已經可以容易處理好多。呢個係RIE育兒法裡面我覺得係好好，喺情緒上面嗰樣嘢，幫到我哋大人點樣去處理小朋友可能喊、扭計問題，或者我哋自己大人嘅情緒點樣控制，我會覺得RIE育兒法都可以幫到好多。
N：係呀，冇錯，其實我未接觸你之前，有時你會知道要企喺佢立場，但係當你情緒嚟嘅時候，你所有嘢都會忘記咗。所以有時真係一兩句說話，佢就好似知道你明白佢咁樣，所以第一時間要冷靜，講係容易嘅，做嘅時候係有少少困難嘅。
C：呢個絕對係，我成日同啲媽咪講：「係呀，我話要保持冷靜，通常你如果做到一半以上你已經好勁」，老實講我一定都有爆炸嘅時候，我喺專頁都有分享過，係正常嘅，我哋係人嚟嘛，但係我哋如果可以嘅話，盡量畀幾秒鐘自己諗一諗先，可唔可以㩒到？有陣時真係會爆，好多時候尤其是我哋控制唔到情緒，就係因為我哋自己大人都瞓得唔好。
如果我哋大人都瞓得唔好，當然BB瞓得唔好嘅時候，令到我哋一晚可能都要醒好多次、瞓得唔好，當你疲勞過度，長期睡眠不足嘅時候，絕對會影響到我哋大人嗰個情緒，絕對會。
我好記得孖仔兩歲幾嘅時候，開始出現嗰啲可以唔使瞓晏覺，半夜三點佢開燈喺間房度開party，我唔知點解feel到，我突然間醒咗，feel到有啲唔對路，跟住望吓BB cam，點解開咗燈喺度玩嘅？跟住先走過去話「你哋做咩事？快啲返去瞓覺！」
嗰一期我好記得我都掙扎咗好耐，佢哋開始drop nap嗰個時間，我自己嗰期嘅情緒都唔係咁平靜，好容易會trigger到。跟住後來就搞掂咗、順利完成咗drop nap，佢哋都穩定咗嘅時候，我自己瞓返多嘅時候，情緒真係會好好多。所以瞓得好唔係淨係講緊BB佢瞓覺生長得好啲，或者發育都好啲等等，對於我哋大人嘅情緒、我哋嘅親子關係等等，都好重要。
所以我成日都喺度諗，唔可以淨係單獨去睇睡眠呢一件事，好多嘢係要退後一步成套去睇。所以點解我會覺得RIE育兒法喺睡眠上面嗰樣嘢，可以幫到好多，我好多時候亦都會畀一啲關於RIE育兒法嘅建議，就係因為要成件事去睇，我哋唔可以將睡眠斬開咗一嚿去睇。
你可唔可以再講一講你當時面對過嗰個情況，第一次就係時間表要調整，第二次就係妹妹唔肯瞓覺，可唔可以再講detail啲？
N：其實佢唔係唔肯瞓覺，係間唔時唔肯瞓覺，可能去到生理時鐘嗰陣時，即係平時瞓開嗰個時間，就唔係好肯入睡，要磨好耐，可能一個鐘咁樣，同埋夜晚醒嘅機會率好高，基本上一個星期可能有五晚會突然間醒，跟住就可能講緊個幾兩個鐘咁樣。嗰段時間所以我就係好大嘅情緒，因為你冇覺好瞓，好似你啱啱咁講，冇覺好瞓真係完全影響到所有嘢，第二朝自己冇心情，佢又冇心情，跟住所有嘢一個循環咁樣。
嗰陣時妹妹大約一歲鬆啲，一歲、一歲一個月咁。
C：一歲有個睡眠倒退期，嗰陣時你有冇經歷到呢？
N：我諗我我遇到個情況已經係睡眠倒退期嗰陣時，所以我嗰陣時就係唔識處理。啱啱撞正嗰啲時間。
C：十二個月大，睡眠倒退期嘅時候，如果有啲媽咪唔知係咩嚟，就係講緊十二個月大嘅時候，小朋友如果佢日頭、朝頭早嗰個覺瞓得太長，可能下晝嗰覺會唔肯瞓覺、瞓唔到，或者都有啲情況會係上晝或者夜晚唔肯瞓覺，但一般嚟講比較常見係下晝唔肯瞓覺。
下晝唔瞓覺，或者瞓得好少嘅時候，夜晚黑你想畀佢瞓嘅時候，佢就已經疲勞過度，咁就會好難瞓到，個掙扎亦都會越來越大。可能一歲佢仲會好似BB咁樣大叫，但佢亦都開始有好多要求，要你去做呢樣做嗰樣，指住嗰啲咁樣嘅情況。歲幾之後個情況係越嚟越多，所以頭先點解話個心理因素嘅影響對小朋友越嚟越大，個比重係會多啲嘅。
我想請你又講一講，你有兩個小朋友，佢哋兩個年紀差好少，爭一歲左右，佢哋嘅情況上你又點樣去做一個安排呢？我覺得呢個係一個好大嘅挑戰。
N：因為姐姐個問題冇咁嚴重，其實嗰陣時到而家為止，都係一齊瞓覺，夜晚嗰覺一齊入睡。但係我就會同姐姐講：「媽媽都知道妹妹有時會影響你，但係媽媽都會喺出面陪住你嘅，如果你好驚嘅時候，你都可以搵公仔陪住你先，媽媽一定會喺你隔離嘅，你放心」。咁佢又好安心。姐姐個影響唔係好大，我基本上同佢講七點半要瞓覺，八點瞓覺，佢都可以即刻瞓覺。
至於妹妹，其實嗰陣我同佢set好個時間表之後，基本上所有儀式進行晒，都已經成件事都好順利。所以就可能因為佢哋年紀相差唔係太大，時間表開始tune得近都OK。
C：好多時候兩個唔同嘅小朋友，最頭痛就係點樣編排一個時間表。如果你有兩個大人一齊去照顧咁，可能都比較容易啲去處理；但係如果一個媽咪一打二嘅時候，要處理兩個唔同嘅時間表，如果兩個都要陪、要抱、要奶睡，好多時候其實媽咪就變咗分唔到身。
N：冇錯。同埋我覺得入睡之前嘅儀式都好重要。雖然講緊同佢吓睇故事呀，好似好簡單，但係所有嘢因為你有兩個嘅時候，唔係你控制佢坐低睇故事就會坐低睇故事，可能佢會走去跳舞，兩個喺度跳舞，情緒變化就好興奮，搞到夜晚就可能瞓唔到，所以如果有兩個小朋友或以上嘅媽媽，安排活動上面可能要留意啲。
C：係呀，好明呀，因為我自己都有對孖仔。通常我同啲媽咪講話：睡前儀式嘅時候，盡量希望緊湊啲，即係成日都講話做完A做B，做完B做C，跟住就要瞓覺㗎喇；就唔好有太多自由活動嘅時間，畀佢喺度玩，玩到好興奮，呢個活動就唔係一個準備瞓覺嘅活動，咁就唔好做。
但係我自己有對孖仔，所以我好明白你嘅講法，就係我諗住想同你做一件事，可能一個刷緊牙嘅時候，第二個一定係走咗去玩。當然如果我先生佢嗰日係可以嚟到嘅時候，可能佢會幫我engage另一個，但係絕大部分時間都係一打二，所以真係要睇返實際嗰個情況去做。
咁所以係呢啲情況之下，我覺得更加重要嘅就係，頭先你都有提到睡前儀式嗰樣嘢，即係你點樣去做成個process，甚至係去到細到刷牙邊一個刷先、跟住邊一個刷，都可能要預先定好，咁樣佢哋就唔會同你講數，話「我唔要刷，佢刷先」，大個啲就開始會推。
N：完全係呀，一定要所有嘢喺你預計嘅時間前已經編排好同講好咗先，如果唔係中間就會打斷咗個計劃，你自己心情就好煩躁，所以都要留意。
C：好多嘢要預告，預定晒計劃，預告好重要就係兩個小朋友嘅時候，佢哋可能兩個去咗玩，你點樣去設限，去令佢哋明白：「OK玩完啦，係要瞓覺喇」，嗰個位都好重要。
N：係呀係呀，我自己個方法，我覺得可以參考吓嘅，就係會播啲靜態啲嘅歌，然後同佢講：「音樂停，你就要執好你自己所有嘢，知道要去做下一個step，就係準備瞓覺，咁準備瞓覺要做啲咩」咁樣。可能佢哋細啦，佢知道音樂停，我諗佢淨係明白有聲同冇聲，可能容易理解啲。
C：係呀，你講得好好呀，呢個亦都係我好多時候去講，對住小朋友嘅時候，佢唔肯去瞓覺，一定繼續要玩，可能去睇書或者去做啲乜嘢嘅時候，你必須要有一個好清楚好清楚嘅ending畀佢，畀佢知道我去到呢個位就要停止，我哋就要熄燈、就要瞓覺，呢個係好重要嘅一點，我稱之為一個結束嘅儀式。有好多唔同嘅做法，總之重要嗰樣嘢就係你要有好清楚嘅一點、一條線畀佢知道，去到呢條線就要停止、要瞓覺喇。呢個係對於小朋友嚟講，處理幼兒、小朋友掛住玩唔肯瞓覺一個好好嘅貼士，多謝你。
最後你有冇啲乜嘢想同其他受睡眠問題困擾嘅媽咪分享呢？
N：其實我真心認為需要畀BB一個睡眠計劃。可能我暫時未接觸到Catherine之前，其實我都聽長輩講：「佢鍾意瞓就瞓㗎喇，唔需要講咁多嘢」，但係自己親身經歷，就係我發現一打二之後，我第一個嘅時候都覺得：「其實呢件事真係順利㗎喎，唔需要有啲咩特別嘅嘢」。跟住我接觸到Catherine之後(先發現)：「原來瞓覺可以訓練㗎，跟住你就發現原來其實揍BB唔係成個世界畀晒佢，你可以有好多時間㗎！」我覺得香港嘅媽媽真係好大壓力，所以呢個訓練對BB好，對自己都好，大家需要可以試吓同了解吓。
C：係呀，呢個其實都係RIE育兒法嘅一個重點，我哋RIE育兒法講緊respect，respectful parenting，我哋係尊重BB，但係同時我哋都希望BB尊重我哋大人嘅需要，兩方都要去尊重。所以我哋講緊我哋大人嗰個personal boundary其實都好重要，好多時候我會講話，我哋成為父母，我哋唔係要sacriface，但我哋要compromise。你冇可能完全跟返你生小朋友之前嗰個生活，係一定冇可能一模一樣㗎喇。但係點樣可以盡量compromise到能夠滿足BB佢哋真係生理、心理上嘅需要，同時間亦都唔會令大人覺得自己犧牲晒所有嘢，唔再係自己，嗰個壓力上面都唔好。好希望可以幫到咁多位媽咪爹哋，真係可以畀到個support大家。
今日好多謝Natalie陪我傾計同埋分享，我哋第日再傾啦！
